李美琪 Monnie
真面目
牛雜之星 12歲幫手 食客$20搭訕 元朗牛雜妹輸港姐想做星
今屆港姐話題性十足，先有想做未來女特首的十優港姐麥明詩，再於入圍名單公布前，有三位參賽者自行宣布退選，麥明詩氣勢太強，班女唔想陪跑可以理解
落選未必係壞事，在第二輪面試已止步的牛雜之花李美琪（ Monnie），輸咗比賽卻贏到民心。 12歲開始在家人於元朗開設的牛雜檔幫手，試過有食客向她搭訕添！雖被指牛雜妹，不過 Monnie不但唔介意，仲好有志氣話：「辛苦我唔怕，最緊要可以達成自己理想。」講到理想，牛雜妹當然係想入行做星
22歲的李美琪（ Monnie）在家姐提名下參選今年香港小姐比賽，雖然冇緣複試，不過無阻 Monnie入行決心。
想演戲做主持
上週六（ 20日） Monnie在爸爸位於元朗的牛雜檔受訪，期間多次幫手招呼客人，更到廚房落手落腳切牛雜！
「由細到大我都好鍾意呢一方面（娛樂圈）嘅嘢，我甚至乎會去讀音樂。以前細細個好鍾意唱歌，但係到大個開始無自信覺得自己雞仔聲。我自己演戲方面係有興趣，細細個會玩話劇嘅活動，同埋我覺得自己記台詞都 ok。所以想試吓演戲，同埋主持方面，因為自己都幾鍾意講嘢。」
𠵱家港姐夢落空，不過 22歲 Monnie似乎已有打算。「我咁樣嘅身形又唔係特別靚女，講真有好多比我好嘅參賽者，我只不過想用呢個機會嚟提醒自己，挑戰吓自己勇氣。我由細到大都真係好想好想可以買一間有泳池嘅屋俾我爸爸。」
以肥苟
Monnie同苟芸慧都係骨架較大嘅人，將兩張相拍埋，其實 Monnie都幾有苟芸慧影子！
「辛苦我唔怕」
12歲已經落鋪幫手，愈大愈靚女的 Monnie多次俾食客撩，不過最經典都係收咗一張寫有電話號碼的廿蚊紙！「我記得有一個好印象深刻，佢問我攞電話，咁我唔俾，佢又好有禮貌，唔係強迫嗰啲，後尾俾錢嗰陣，我仲記得佢喺張廿蚊紙後面寫咗佢電話號碼，之後就話『我真係想同你做個朋友，希望你可以打個電話俾我』。其實我有猶豫過好唔好打，但係之後我發覺，因為嗰陣太忙，我將張錢找咗出去。」
首次面試後已有多間經紀公司跟 Monnie傾簽約條件，佢講到明：「辛苦我唔怕，最緊要可以達成自己理想！」不過 Monnie其實都有底線，「我嘅底線係唔好令爸爸媽媽丟架。」
玩吓就閃
上週四（ 18日）港姐第二輪面試完畢，入圍名單都未公佈，已經有三位參賽者自行向外宣布唔玩！當中「 fit版楊洛婷」 Mandy最令人失望；而女版張立基 Judy就被指最有自知之名。
「 fit版楊洛婷」 Mandy
樣靚身材好嘅 Mandy雖然未稱得上係大熱，不過都唔睇得少！可惜 Mandy日前因抵受唔住輿論壓力所以唔玩，仲用 WhatsApp語音回覆本刊：「上次被追訪係有少少嚇親同不知所措，你哋寫得我太好喇，網上啲人話我係俾錢，叫人做新聞，其實愈早知呢行唔啱自己咪仲好。」
「女版張立基」 Judy
比較騎呢嘅 Judy喺面試前已經喺 facebook寫過「有男朋友真的要放棄很多機會」，點知佢轉頭真係退選。有口痕友就懷疑佢明知入唔到圍，畀個下台階自己喎！
「谷胸心悠」 Celine
Celine於第二輪面試當晚，就以私人理由自行宣布退選，不過在其 fb仍有 update新相，繼續任睇。
|
鍾意就快D Share啦！
|
|
|
