全知言
最爆笑女演員 吳君如贏晒啦
神劇《大時代》播完，好彩緊接就有周星馳主演嘅《他來自江湖》煲！之不過數到笑星代表又點只得星爺一個，女笑星都唔輸蝕㗎！今個星期，全知言問咗一班藝人心目中女笑星，結果吳君如憑住《家有囍事》黃面婆一角撼低星女郎趙薇、莫文蔚，真係最搞笑係佢
周秀娜 《 12金鴨》
最鍾意喜劇女演員梗係吳君如，以前有睇過佢嘅《家有囍事》，去到《金鴨》可以同佢合作，現場見到佢嗰種女人嫵媚再到男性嘅強壯、魅力，都拿揑得好好，好佩服佢，每一次睇都會笑到啲妝溶晒。
周國賢 《 My盛 Lady》
我心目最喜愛喜劇女演員係蝦頭， 05年已經認識佢，嗰時做緊舞台劇。我覺得佢天生已經係一個笑蛋，佢唔係做戲而係做番自己，一望落去已經覺得好好笑， chok出來嘅樣好有抗抑鬱作用。印象最深刻係《 My盛 Lady》，有一幕佢同子華係海傍，被子華踢爆，本身係一個小公主，突然間變到開始生鬚，成件事都好勁！
吳千語 《情聖》
一位係君如姐，一位係毛姐毛舜筠，兩個人都合作過，最深刻嘅對白係毛姐嗰句「唔好咁大聲，老人家會聽到」，到𠵱家都仲係有好多朋友攞嚟講笑。君如姐就鍾意《家有囍事》嘅黃面婆，喜劇絕對唔容易演， energy要好高，觀眾睇到嗰幕可能 2分鐘，做可能做咗 5個 take，所以好佩服演喜劇演得好好嘅演員。
Kabby@少女標本 《家有囍事》
Kabby＠少女標本：我心目中喜劇女演員係吳君如，佢係一個非常好嘅演員，無論咩戲路都演繹得非常好，我好鐘意佢嘅《家有囍事》，最深刻入面唱嘅嗰首歌，「相逢何必曾相識，無謂令你令你…」。
袁紫僑@少女標本 《食神》
我心目中喜劇女演員係莫文蔚，雖然佢平時好文靜，行氣質路線。係《食神》扮一個帶住牙箍、好鄉下嘅角色，過咗咁多年，記憶都仲係好深刻，最記得佢斬肉丸嗰幾幕。
Tyrese@BOP 《食神》
我最鍾意家燕姐，佢以前拍過好多笑片，代表都有《食神》，食完黯然銷魂飯，佢就好認真咁話：「嘩！真係好黯然，真係好銷魂，實在太好」佢可以將一個好普通嘅台詞，做到好全神，可以令到嗰件事豐富晒，講一啲好笑嘅嘢但要係認真嘅狀態下，所以我覺得非常之犀利。
街訪讚君如：《金雞》夠大胸
一班街坊對於女笑星各有所好，不過吳君如照樣成為大羸家！
|
鍾意就快D Share啦！
|
|
|
