【鳩嗚乜乜乜】
費清舊同事人妻茵住喺離島，每次出嚟食晚飯之後，都滾水淥腳咁走，因為要趕搭船。曾經喺台灣做過嘢嘅佢，話台北好多深夜打躉嘅地方例如誠品，但香港就除咗夜場就冇乜好去處，（香港誠品都唔開通宵啦）。
#不設送貨安裝服務
人妻當然唔方便去夜場，但佢咁鍾意買砂煲罌罉，買到成屋都係港女煲Le Creuset，嚟緊可以試吓深夜去IKEA蒲呀。唔係玩佢㗎，因為宜家家居九龍灣分店（圖），將會喺26號（周五）夜晚11點至27號凌晨2點，首辦「深宵瘋狂購物夜」，呢3個鐘內會有大量絕版貨品以最低一折發售，包括座椅、貯物家具、燈飾等。
買到肚餓唔緊要，因為都有消夜食，宜家餐廳嗰晚會營業到凌晨一點。瑞典美食廊食品亦都會有85折優惠。不過，購物優惠只適用現有存貨嘅正價貨品，並唔包括陳列貨品。另外，當晚不設送貨、安裝及代存服務，亦都冇傢俬訂購、退貨同更換服務。所以，顧客買咗嘢要即時拎走貨品，如果買大件家具就一定要預備車喇。有咩可以打電話去31250888問吓。
費清
＃要生計，也要生活＃毋忘初衷
|
鍾意就快D Share啦！
|
|
|
