韓國男演員好重視髮型，姜河那形象一變剪短髮，原來都係為咗新戲角色。
日韓到會
唔恨拍戲 姜河那：我最想拍紀錄片！
年紀愈大，愈不想大，最好可以時光倒流重返學生時代。現實生活中，無可能回到過去，難怪青春電影長拍長有。
韓國電影《 Twenty》由《陽光姊妹淘》編劇李炳憲處女執導，搵嚟三位喺偶像劇熟口熟面嘅男演員擔正，姜河那做代表嚟香港宣傳。成日喺電視劇入面做學生，姜河那都話想返回學生時代，仲話唔做幕前，希望可以轉行做幕後拍紀錄片！唔係啩？
最喜歡飲酒
《 Twenty》由金宇彬、 2PM成員李俊昊，以及姜河那主演，講述三個死黨面對二十歲呢個人生關口，有期待同時又有不安，於是喺二十歲呢一年定下人生目標，努力實現之餘鬧出唔少笑話！三位男主角年齡相近，姜河那仲曾經同金宇彬喺《繼承者們》合作過，今次再度合作，加多個李俊昊，喺鏡頭以外就好似拍緊另一套《 Twenty》咁好感情：「跟他們工作，發生很多趣事，每一天都過得很開心，我們經常講笑，拍攝氣氛很愉快，其中有一場戲講我們去飲酒，玩得很高興，令我印象最深刻。」呢一場戲真係啱晒佢，因為姜河那出咗名好酒量，牛高馬大嘅金宇彬都自嘆唔夠佢飲。「我很喜歡飲酒，家中有個大酒櫃，每天都會淺嘗幾杯，不過我甚少喝醉，就算偶爾醉倒了都不會發酒瘋，只會去睡覺。」
唔想做演員
姜河那近兩年不停拍電影，今年就有三部戲排住隊上映，連埋上年套《怪談少女》，算係非常多產。雖然喺演技上獲得肯定，不過如果返去二十歲，姜河那想試吓行另一條路：「時光倒流的話，我想我未必會再做演員。其實我以前有一個夢想，希望拍攝紀錄片，現在，我仍然會在家中看紀錄片頻道，有時候看到一些故事都會很心痛。」塞翁失馬，焉知非福，而家成為最有潛質嘅演員之一，導演李炳憲都十分睇好佢：「當初起用姜河那的時候，當然會有一絲不安，始終起用新人會有點擔心，不過他非常努力，表現非常好，有幾場戲更加超乎我的預期，效果非常好，令我很驚訝。」
無懼新沙士 T-ara握手抱抱樣樣齊
韓星嚟香港同歌迷作近距離接觸， fans梗係開心，不過最近韓國新沙士肆虐，就算幾開心，都要安全至上。韓國女團 T-ara嚟到香港，喺商場出席握手會，由於成員智妍忙於拍戲，六缺一。今次 T-ara宣傳自己主演嘅微電影，佢哋每人主演一個愛情小故事，喺握手會上佢哋同 fans玩遊戲， 5位成員超級進取，一個繑住男 fans隻手，一個同女 fans頭貼頭，仲有一個輕碰男 fans嘴嘴，令無得上台嘅 fans叫到拆天！最後 fans開始排隊同 T-ara握手，上台之前 fans要先噴消毒酒精， T-ara賣口乖話唔介意，仲話 fans對手會為佢哋帶來溫暖，真係識做！
|
鍾意就快D Share啦！
|
|
|
