上週五（五日）朱麗倩同 Hanna從吉隆坡返港，準備翌日出席粉絲聚會。
探熱針
帶妻女見「家屬」 劉華 check袋查 ID
轉眼間，劉華與朱麗倩的寶貝女劉向蕙（ Hanna）已經三歲，夠秤入學，一向採取密封式保護的劉華，亦要面對現實，讓囡囡與外界接觸。
繼今年四月，朱麗倩帶埋 Hanna飛北京為老公慶生， Hanna的盧山真面目曝光後，上週，劉華在歌迷會成立廿七周年派對中，亦安排朱麗倩母女上台，與「家人」見面。著住黃色裙仔的 Hanna非常怕醜，全程攬實爸爸，十分黐身。
講得出做得到
去年劉華曾在歌迷聚會中開出期票，承諾「等佢三歲就俾大家見」，事隔一年，劉華言而有信。上週六（六月六日），「華仔天地」在九展舉行廿七周年會慶，天王女 Hanna終於現身，同過千粉絲「家人」見面。「家人」開 P，場內保安嚴密，每個入場的「家屬」，都要登記身份證，入場前更要 check bag，嚴禁帶相機及攝錄機，場內不能使用電話，保安人數亦比往年多出一倍。
聚會到尾聲，劉華獻唱《心肝寶貝》時，台上的大熒幕開始播放天王一家三口生活照，當中包括 Hanna的 BB期照片，當時的 Hanna頭髮不多，眼大大，五官已非常精緻；劉華請父母上台一齊切蛋糕影大合照後，在台上說：「我仲想同大家介紹我兩個寶貝……」
怕醜搵爸爸
台下「家屬」開始瘋狂尖叫，但等了半分鐘，朱麗倩母女仍未現身。原來第一次面對如此場面的 Hanna突然驚驚唔願上台，劉華見狀，即時走去台邊安撫， Hanna一見爸爸即飛身攬實，劉華亦一手抱住囡囡，一手拖實老婆上台。
著住黃色裙仔配涼鞋的 Hanna，怕醜伏在爸爸心口，直至媽咪朱麗倩在她耳邊耳語後， Hanna才肯擰轉面望向觀眾 say hello。
「我尋晚同佢（ Hanna）講，爸爸開演唱會你去唔去？佢即刻話『去』！跟住我問佢唱唔唱歌，佢又話：『唱』！」之後劉華將手上的咪遞向囡囡嘴邊，但 Hanna卻一手推開，之後又再伏在爸爸心口，搞到劉華冇晒符。
著白色長裙化了淡妝的朱麗倩，睇住兩父女，全程笑到見牙唔見眼。之後大會安排一家三口影合照，兩公婆要夾手夾腳，先氹到 Hanna望鏡頭，影完相，劉華說：「好佢哋要走先啦，唔好嚇親 BB！」
停工陪開學
十點半，朱麗倩母女和劉華的父母先行離開，過十名保安及保鑣護送一行人到停車場，朱麗倩心情大靚，拎住熒光棒和工作人員有講有笑，至於 Hanna就由傭人抱住，遮面上車離開。
據了解，剛完成新片《長城》的劉華，下半年將全面停工，做廿四孝爸爸，陪住 Hanna適應上學生活。
「華仔嚟緊除咗出席內地歌迷會聚會，其他 job都唔接，話要專心陪 Hanna開學，佢兩公婆見咗幾間心水幼稚園，全部都係九龍塘區，一來近屋企，二來佢哋 prefer傳統學校，揀嘅都唔係國際學校。除咗一家三口一齊去 interview，華嫂仲連學校開放日、講坐都全部出席，親自了解學校環境，準備功夫做得好足。」
帶女返娘家
上月底，劉華要留在青島為新片《長城》趕埋尾，朱麗倩趁空檔帶埋 Hanna返吉隆坡娘家探親十日；直至上週五（五日）才返港。落機後，同行保鑣已提高戒備， Hanna由外傭孭住步出機艙，並由兩保鑣、工人及助手護駕；眼仔碌碌的 Hanna則不時四圍望，十分精靈。出閘後，一行人更將警戒程度升級，外傭用大毛巾將 Hanna包實，不讓她的面仔外露，大家開始加快腳步離開。
大家庭
劉華的「大家庭」華仔天地，早於 1988年已成立，是一個極具規模的全球性歌迷會，成立近 22年至今，會員人數約八千人，會費分為$230（一年制會籍）及$1,040（五年制會籍），於香港及台灣設有總部及分會，香港總部位於九龍灣宏光道，會舍裝潢簡潔，設有接待處、休閒區、活動室及展覽區（展示劉華歷年所獲的獎項）。
「天地會」不定期舉行季度聚會外，每年都會舉辦兩個大型活動，包括周年紀念日及華仔生日會，讓歌迷與偶像近距離接觸，活動以抽籤形式舉行，每年均吸引逾千名來自各地的會員參與。此外，亦有各類型的興趣班及比賽，如書法班、品酒班、保齡球等，讓會員自我增值及聯絡「家人」情感。
|
鍾意就快D Share啦！
|
|
|
