惡搞《大時代》 18角 泰臣：一個人扮晒至好玩！ [FACE - 422] 大時代,MF,

爆 Like王

惡搞《大時代》 18角　泰臣：一個人扮晒至好玩！

《大時代》早前重播仲 hit過黃金劇，鍾意扮鬼扮馬嘅泰臣就食住條水，惡搞主題曲〈歲月無情〉，改名叫「泰大揪」一人分飾劇中 18個角色仲扮埋秋官唱歌，連衣著、拍攝場景都抄足《大時代》， MV上載一個星期已有近 10萬人睇，確係勁！

而原來仲有一位幕後功臣係同屬經理人公司嘅周俊偉，周俊偉做埋監製兼導演，用咗 8日睇晒 40集《大時代》兼籌備同拍攝加後期，趕及大結局同日出街，雖然趕但製作水準極高喎！

F：《 FACE》　泰：泰臣　偉：周俊偉

原來泰臣惡搞《大時代》嘅〈大揪時代〉 MV，幕後搞手係周俊偉，佢更兼任導演同監製。

泰臣同周俊偉玩盡《大時代》，但有啲場景經過廿年好難唔變，只好盡量搵似模似樣嘅地方拍攝。佢哋會帶我哋重溫玲姐怒打丁蟹嘅案發現場，記得下載 FACE Pop睇片喇！

拍攝前要搵齊所有角色造型照，然後泰臣要戴上假髮同化妝，扮到似至開始拍攝。

泰臣扮李麗珍呢場落雨戲幾乎拍唔成，咁啱有日突然暴雨至即刻拉隊拍攝。

F：點解惡搞《大時代》 MV而且一人分飾 18個角色呢？

泰：平時唱 K佢（指住周俊偉）係咁點啲舊歌俾我唱喇，唔知點解佢好鍾意聽我唱。

偉：有日喺屋企睇《大時代》，首歌真係好聽，又覺得（鄭少秋）把聲底好似泰臣，不如拍隻 MV啦，不如拍埋啲片段玩吓

泰：我有叫佢扮劉青雲呀，冇理由我玩晒吖！全部係我，我驚有啲攰，但佢好堅持，話我一個人扮晒至好玩呀！

F：扮咁多個角色有冇難度？

泰：係好有難度，初初佢話扮晒所有角色，我以為只係丁蟹、劉青雲呀、方進新嗰啲啫，原來係所有喎，連賤婆婆都要扮埋。好難！譬如扮女仔我有鬚嘛，又想有美感但又拍緊戲唔可以剃，咪叫化妝師用啲技巧用啲粉令到啲鬚同膚色相近啲。仲有玲姐藍潔瑛啲戲真係好勁！我哋 Google晒啲劇照，鋪晒成道牆都係啲相，好似入定咁照住嚟做。

偉：要花好多時間篩選情節，專登加啲愛恨交纏 feel啦，例如丁蟹同玲姐同進新；又有邵仲衡同珍妹嘅感情；方展博、慳妹同紀文三角戀咁。場景都難搵，譬如台灣景同廠景，股票行呢啲直頭冇拍到。

呢套扮陶大宇嘅橙色西裝幾近絕迹，負責美術嘅 James行勻港九新界都買唔到，有日喺街見到有女仔着住至問到邊度有，所以泰臣呢件其實係女裝。

F：對《大時代》印象最深係邊場戲呢？

泰：掟啲蟹落樓嗰場啦，因為真係好爆同好興奮㗎！重播剪走咗係有啲可惜，我唔係好滿意結局改咗丁蟹畏高所以冇跳樓囉！我哋拍咗利蟹跌落樓個 shot，但效果唔太似所以冇用到。仲有講方婷去離島搵孝蟹嗰場落雨戲，我哋冇皮費，唔通 book水車咩，咪唔拍呢場囉！點知嗰晚突然雷暴，周俊偉跳起：「喂！落雨喇等咩？」即刻 call人返嚟，我就換衫整條長辮，即衝落露天停車場拍咗佢。我生平未試過嫌啲雨唔夠大嘅！

周俊偉只喺 MV中低調客串，喺後面低頭扮劉青雲嗰個就係佢。

F：𠵱家重播《他來自江湖》，會唔會食住條水惡搞埋星爺？

偉：如果你話𠵱家食住條水叫泰臣再做，哦 sorry！ no！因為我覺得冇意義！

泰：真係要睇下有冇感覺湧上嚟，如果又係咁澎湃嘅話， why not？但呢剎那未 feel到嗰種欲念。我好鍾意《天師執位》，話唔定會搞㗎！嗰時都想做吓燕赤霞嗰啲角色。

偉：你想搞古裝？

泰：過咗夏天先得唔得？即係條命，我年紀唔細㗎喇！

鍾意就快D Share啦！

下一篇 》