真人騷
轉行保險 重提鄧萃雯婚外情 52歲江華：貓食唔食魚？
劉德華真係好似江華！
把「江華比劉華更劉華」調轉來講，是江華提議：「點解係要話我似佢？點解唔係佢似我？講咗咁多年都悶啦，不如調轉會唔會仲有新意？」生得似劉華，並非江華控制範圍之內，這一 part我絕沒異議，亦依照江華意思如是落筆，江先生，還滿意嗎？
劉華其實一啲都唔似江華！
撇除五官、動靜，同 52歲都 keep得 fit，以及行出露天花園拍個照，都似有 spot light打住一樣，搖曳又瀟灑壓軸出場以外，我可以肯定，劉德華不會轉行做保險、不可能肯被人拍到大汗淋漓自己洗車、更加肯定絕對不容許記者重提人生污點（如果有污點）。
這天我問到 95年因為拍攝《我和春天有個約會》搭上鄧萃雯、與麥潔文剛滿三年的婚姻一度告急，江華既不覺得被冒犯答起來亦絲毫不見閃縮：「貓食唔食魚？男人鍾唔鍾意女人？當年年少無知，所以明知錯都會做……要看實，你覺得我老婆邊看得實我？係我𠵱家醒咗，君子不立危墙之下，簡單嚟講，即係唔會再俾機會自己、亦唔會再俾機會別人。」
因為腰傷腳傷加上情緒問題，江華停工將近十年，亦幾乎消失於公眾眼前將近十年。直到三個月前復工轉行撈保險，突然鋪天蓋地的又登上雜誌封面、報紙頭條。
我是真心感激江華，一通電話，他第二天就風度翩翩神彩依然的應邀前來。訪問沒有酬勞可言，坦誠相告又有被人打亂寧靜、舊事重提的危機，他說來做訪問，正如轉行做保險，哪裡有需要、他就會出現在哪兒：「年輕時會度過算過先，效果會唔會好、做咗會唔會蝕，其實年紀有番咁上下，好多嘢都冇得計，係你以為有得計啫嘛！」
介懷人把口，食藥都唔掂
轉行做保險再受注視，感覺如何？
有咩感覺啫？咁多份（雜誌報紙）都係我，開心就做啦、想同我傾偈就偈啦，我唔推訪問、洗車都同佢認真傾，人哋我唔知，我講我自己，人哋點寫控制唔到，我係藝人，對方係傳媒，大家互想配合囉。另一個角度，邊度需要我，我就去邊度。今日係咁啫……年輕時我都唔係咁諗。
年輕時係點諗？
要度過算過先，會唔會效果唔好、會唔會蝕……但當個人閱歷越嚟越多、見嘅嘢多，你就會知道好多嘢冇得計，係你以為有得計啫嘛。
唔怕人哋摷返啲舊史嚟講咩？
唔怕！你做到點，好與唔好都有人講㗎啦，如果真係咁介懷人哋點講，就食藥都唔掂㗎喇！
腰腿傷患係你息影咁多年主要原因？
係，每個人發病處理方法唔同，我係嗰啲 handle唔到嘅人，我慣咗咩都控制喺手，但嗰陣時坐唔到企唔到亦都瞓唔到，覺得咩都控制唔到、連攞杯水都難嘅，自信心一路跌、跌到負，死咗一樣。我冇去睇醫生冇食過藥，抑鬱症係人哋講，但我都知自己情緒出問題，已經去到一個危險嘅狀態。
最終如何走出嚟？
好微妙，係靠信仰。
我一早應該攞咗電視獎
生理傷痛，信仰點解會幫到你？
其實好多時係心理問題，件事發生咗，我心理有問題就會將佢無限放大，本來未必有咁嚴重，你明嘛？宗教俾到人係心靈上嘅平安，平安呢兩個字好緊要，我哋辛勞工作都係為咗得到平安、唔使憂啫……其實係唔係呢？錢係唔係真係幫你得到平安呢？
你學咗咁多年佛，甚至諗過出家，點解佛學當時幫唔到你？
呢個問題好有趣，我當日都問過自己，學咗咁多年、打坐咁多年、又茹素三年，點解喺一個問題出現嘅時候，之前學嘅嘢冇晒呢？……事後我體會到，呢個就係人嘅限制同不足，我哋以為自己好得、以為擁有好多，原來，一件事已經足以將你擁有嘅所有財富、知識、能力瞬間擊碎、全部擊碎，原來真係咁……事前我真係以為學埋咁多嘢就係喺呢啲時候用、我真係以為人定勝天，原來唔係。所以話，唔好嘅時候，抬頭望下個天，你會發覺其實唔係冇出路，而當你覺得自己膨脹，又望下個天……其實你真係好渺小。
你紅過，攞過金像新人（ 89年《但願人長久》）又攞過台慶男主角獎（ 03年《九五至尊》），有冇自我膨脹過？
我諗，應該或許有啲……不過唔係攞金像獎嗰次，我攞獎嗰年喺演藝學院舉行頒獎禮，我仲記得嗰晚，我攞住個獎一個人喊住走過灣仔海傍……
點解要喊？
因為拍嘅過程好辛苦、因為第一次攞獎，百感交集。諗下減咗廿磅肥，幾個月淨係可以食能量 bar，嗰啲叫悲喜交集。至於喺 TVB攞獎嗰次，又唔係太大感覺，如果要攞電視獎、如果有電視獎，我喺 ATV時已經要攞啦……如果嗰陣時有舉辦呢啲視帝視后獎，我真係當佢一個遊戲而已。我喺電視圈又唔係新人，一早識得當佢係一個遊戲。
年少無知，所以明知故犯
當年因為婚外情做咗新聞人物期間（ 95年與鄧萃雯拍劇撻着婚外情），係唔係都咁識諗？
哈哈……我又唔覺得係人生低潮，淨係覺得年少無知。每個人都要經歷，我今日回頭去睇，有咩啫？有咩咁大不了？做人最緊要唔好後悔。
年少無知指嘅係？
年少無知係指，唔識分辨咩應該做，咩唔應該做。呢啲亦都係我頭先話嘅人性不足，明知唔啱但係我做咗，呢個就係不足。點解要學做人呢？所以我今日都喺度講緊學做人，呢個係一生嘅功課。人總有失手、失控嘅時候，問題係失手後有冇心改過自己、件事發生後有冇得着。
當時用咗幾耐時間同太太修補裂痕？
一個人最緊要有思想，識得分辯對錯，每個人都有錯嘅時候。一對夫妻相處最重要係包容體諒，當問題出現要一齊面對。其實我睇到好多夫妻出問題都係因為唔識包容，只係識怨、去批評。兩個人嘅相處，係好大好大嘅學問。
出軌嘅原因係誘惑？係新鮮感？定係嗰下火花你真係㩒都㩒唔住？
就講俾你知，簡單一個道理，貓食唔食魚？男人，會唔會唔鍾意女人？其實好多嘢好自然會發生，問題係有冇空間有冇時間發生。學做人學修為，就係話當有機會有空間發生時，有修為嘅人相對會好好多。唔好覺得太希奇，男人就係咁、女人就係咁……
下次呢？你覺得學精咗，唔會再出錯？
下次唔係話醒，係應該點都比之前醒咗啲，會知點樣處理，盡量唔好俾自己再陷入一個危險境況。有句說話叫君子不立危墙之下，即係簡單啲講，唔好俾機會自己，亦都唔好俾機會人。
嗰次以後經常有大字標題話太太要看實你，當真？定係你特登俾佢看住，唔俾機會自己犯錯？
絕對唔係，其實佢（麥潔文）點會看住我？佢亦都我看唔到我如果我真係要出軌，真係要破壞我哋之間嘅感情，佢邊有可能看到我？你諗下就知冇可能，反而有時調返轉，去拍戲係我邀請太太同我一齊去……點解吖？你會問係唔係我怕自己冇定力吖？唔係，我話過感情要維繫，維繫係要喺日常去做。
冇靠老婆，我都搵好多！
𠵱家同太太之間係愛情？感情？伴定係 soulmate？
全部都有，我成日都同老婆講，就算我哋結婚廿幾年，都要保持拍拖嘅感覺，𠵱家我哋兩個都係向呢個方行。唔好覺得結咗婚真係應份，唔使講都明、唔使化妝、唔使搞咁多嘢。我成日同佢講我愛你，佢都會同我講，呢啲嘢係雙向㗎。
你喺訪問講過，經常不惜工本買禮物氹佢開心？
Kitman唔係嗰啲鍾意物質嘅人，其實佢最開心，係我十年以嚟終於有動力出嚟做嘢，佢係開心到不得了。除咗佢仲有好多人開心，好多人話我嘥料，仙杜拉都係咁話：「你唔拍戲好鬼自私！」佢話個天俾咗咁好條件我，但我收埋自己係自私喎……咁我享受屋企吖嘛、鍾意洗衫洗車、鍾意車老婆出街做司機吖嘛……因為從來都係拍戲拍戲拍戲，冇享受過呢種生活吖嘛！
停工咁多年，係咪真係如外間所講，要靠太太養家？
當然唔係啦，我都搵好多㗎……都唔少啦，經濟上我哋絕對冇問題。
你經歷過高低、遇過正負兩極新聞，有咩可以同後輩分享，遇上起伏同新聞，應該點看待？
我覺得最緊要係知自己做緊乜嘢，知道自己要乜嘢。人會迷惘係因為唔知自己做緊乜嘢、想要乜嘢，你會被環境同聲音影響、會唔識分對同錯，喺呢啲情況係危險嘅。如果清晰，向自己要嘅方向去，就 ok。好多人唔知自己係乜嘢，人哋話你神，你就當自己神，人哋話你係乞兒，你就會當咗自己係乞兒。
聽太太講， 20歲嘅細女學緊唱歌，有興趣入行？
係，我覺得佢係唱得好，如果再俾多啲實習經驗，佢可以係個出色歌手。但係上唔上到位，唔太關唱歌事，都要睇佢性格同因緣造化。
以你經驗，佢嘅因緣造化呢？
冇得教，我教咗佢都唔會聽。呢行講創作，演戲好、唱歌好嘅人一定有自己諗法，下下叫佢一就一、二就二，呢個人最叻都係做到一同二囉……點樣做到咁多，我要個女自己摸索，但呢種人註定辛苦，我喺佢身上見到我自己，係我啲 DNA嚟嘅。年青時一樣，叫我行我就要企，呢啲人註定要行好多寃枉路，可塑性亦都好高，可能好成功亦都可能一事無成。有啲人你睇得出佢去到邊，有啲人你無法想像，我個女就係呢種。
備註
1.劉德華，我個人嚟講一般般，不過當年我真係至愛《九五至尊》，無論江華定張可頤，都係狀態巔峰冇得頂。
2.越傾越係覺得江華實在似劉華，亦都越係覺得呢啲嘢係天生，尤其那些劉華上身小動作，刻意扮其實仲難。
3.係貪靚嘅，不過並非想像中姿整。我說會找人負責形象、三輯相換三套衫，他說：「唔使喇，我嚟唔係行 fashion show。」
4.使唔使看實？實情兩公婆真的是一起亮相，不過 60歲並且保養得宜的麥潔文硬是不願上鏡，並且在訪問中途、問到鄧萃雯前先行離開，確實冇「全程」看實。
5.江華說剛拍拖的女兒有天問他：「男人其實想要乜？」他答：「男人其實係狗 X……」接下來屬於私下交流兒女經，就不一一相告了。
|
鍾意就快D Share啦！
|
|
|