管家婆 監製扮老闆娘狂鬧人 應采兒：我不嬲鍾意管嘢 [FACE - 422] 應采兒,MF,

問到應采兒係咪成日鬧人，她即問：「邊個講？我哋唔係鬧囉，我唔係成日鬧人呀！」

真面目

管家婆　監製扮老闆娘狂鬧人　應采兒：我不嬲鍾意管嘢

女人天生鍾意管嘢，如果攞正牌就更加變本加厲，好似應采兒喺 Letv網劇《天才在左瘋子在右》除咗係演員仲係監製，加上有「龍五」向華強拍心口力撐，應采兒喺片場即變武則天，除咗成日鬧演員，仲對一眾台前幕後工作人員呼呼喝喝，女主角 Stephy就話：「佢惡嗰陣好惡！」而應采兒就解釋：「我不嬲鍾意管嘢，邊個話我成人鬧人呀？我哋唔係鬧囉，我哋玩得開心啫。」似乎得你開心囉！

31歲應采兒 10年嫁給陳小春後育有一子 Jasper，性格一向剛烈的她，脾氣火爆，就連以前爛玩爛飲嘅小春同佢一齊後，都驚咗佢唔敢四圍去，今年撞正有強國資金的 Letv想攻香港網劇市場，揾應采兒拍《天才在左瘋子在右》兼監製，除咗睇哂條數，連演員都任佢揾。從未如此大權過。

《天才在左瘋子在右》記者會當日向華強專登到場撐應采兒，加埋 Letv副總裁及亞太區執行總裁莫翠天（右），有兩大猛人傍住，應采兒當然橫行片場啦。

小春同應采兒喺《天》劇玩哂，由演員陣容到揸數都做哂，據知小春都成日鬧人，但當然唔夠應采兒勁啦。

Stephy話呢次收搭膊頭演出，而方力申亦有客串幾日，應監製雖然片場惡，但一收工就會 nice返，開工緊張啫。

今年 4月《天才在左瘋子在右》舉行記招，一向當應采兒親生女的向華強亦到場力撐，但可能應采兒太緊張成績，套劇一開工就見人就鬧，工作人員手腳慢，即被應采兒請食「貓麵」，而一眾演員由男主角柯有倫，女主角 Stephy等甚至拍一兩場嘅李燦琛、張建聲等，其實好多都係因為應采兒老死，而收人情價演出，但有時應采兒太緊張都會鬧佢哋兩句，前週四（ 11日）《天》劇煞科宴， Stephy都說：「佢惡嘅時候好惡，我覺得佢係應該有一個權威喺到，佢係有原則，唔係特登鬧人。」而應采兒就解釋：「我不嬲都鍾意管嘢㗎嘛，今次順利成章就去管，（有人話妳成日鬧人？）邊個話㗎？冇喎！我哋唔係鬧囉，我哋係玩得好開心啫，（咁你有冇鬧過人呢？）我哋嗰啲鬧係平時嗰啲囉，你知唔知自己問咩呀？（我問妳係咪成日鬧人囉？）我唔係成日鬧人呀！」講完應監製就掉頭走，好強氣勢呀！

Stephy（真實對白）

佢惡嘅時候好惡㗎！佢係好有原則，佢做緊監製應該做嘅事，唔係因為惡而鬧人。

趙碩之（真實對白）

佢惡係有道理！

張建聲（真實對白）

我講一句佢窒番我 3句，不過笑住窒啫，佢個人好 nice！

Letv好叠水

煲劇網民應該下載過 Letv，嚟緊將會投放資源拍網劇，而 3月李敏鎬香港演出會亦係 Letv科水，更有唔少電子產品推出，手機、電視等。國企幾時都叠水，你估大台獨沽一味搞劇集節目咁單一咩。

Letv個網頁有 4K LED電視賣 5、 6千蚊就有，絕對經濟。

除了電視劇， Letv亦有搞演唱， 3月李敏鎬香港演唱 Letv就係主辦單位。

鍾意就快D Share啦！

下一篇 》