半百出寫真破書展紀錄 羅霖大解放
現年50歲的羅霖，三年前經歷女人最痛，慘遭家暴，最終決定與劉坤銘離婚，結束十六年婚姻。一切由零開始，羅霖年前豁出去接拍處女電影，床戰比她細十九年的關楚耀。今年羅霖再度「破處」，以高齡女模姿態殺入書展，推出寫真集，索爆人母美魔女，迎戰𡃁模趷籮露罅，未開戰已贏幾條街！
家長望子女贏在起跑線，𡃁模當然想贏在事業線。不過，年過半百的羅霖，強調今次出寫真並非要與𡃁模一較高下，昨日羅霖接受本報專訪時說：「我真係冇諗過我半百先出寫真，絕對係超齡女模，我1991年參加亞姐後，第一次咁激，我諗呢個唔單止係處女作，亦都係最後一次。」
■年過半百的羅霖，擁34Ｃ、25、34索爆身材，撼贏不少𡃁模。攝影：郭賢興
■羅霖揚言不介意發展姊弟戀，亦自爆有比她少十歲的男士正追求她。
■性感程度爆燈的羅霖，笑言今次是最後一次。
與三子關係Close
羅霖早前自爆為了今次的寫真集，不惜花了六位數添置新裝影相，她透露：「今次影咗至少五十個造型，幾個月前韓國仲好凍，返嚟肺炎，食咗一個月抗生素先至好番，好彩啲相效果好好。」問她影寫真前可擔心兒子會反對？羅霖笑說：「佢哋好支持，大仔仲陪埋我去，用行動支持我。」不過，羅霖說囝囝見到她在室內着泳衣影相就有點不習慣：「佢有份幫我揀相，但佢都係鍾意我着晚裝多啲，睇唔慣我着泳衣，又話個妝唔似我。」羅霖又爆大仔有興趣做模特兒，有時去兼職影相，她說：「我同三個仔關係都好close，關係好似朋友咁，佢哋乜都會同我講，識到女仔都會問我好唔好。」問會否介意兒子發展姊弟戀？她笑指自己是個開通媽咪：「一啲都唔介意，最緊要心哋好，對我個仔好就夠喇！」
■羅霖為影寫真極速減磅，最弗時只有一百磅。
■羅霖最錫三個兒子，她希望將來的男友對家庭有責任心。
追求者已有心水
與劉坤銘離婚後，羅霖身邊不乏追求者，問可有被兒子催再婚？她笑說：「佢哋冇催我，但想我拍拖就話畀佢哋知，等佢哋幫吓眼。」問現在是否有追求者？羅霖即哈哈笑說：「咁都有嘅！」她坦言追求者中有很多年紀比她小：「我接受到姊弟戀，𠵱家追求者中都有個比我細十歲，但我覺得冇問題，最緊要溝通到。」羅霖表示已活到半百這個年紀，擇偶條件只有一個：「一定要對家庭有責任，錫我幾個仔就得喇！」不過，羅霖笑言這幾年一切要由零開始，忙到冇時間拍拖，最快年底前才開始與異性約會，她笑說：「其實心目中都有三個人選，仲要三揀一，不過𠵱家講咗出嚟，唔知會唔會走晒㖭呀！」
撰文：小米
服裝：La perla、showtimeconcepts.com、intimissimi
首飾：Marni、AGATHA
造型：Red Chan（助理：Jack Lee、Klary Tang、Him Poon）
化妝：Peggy Tsui
髮型：Jay Cheung
蘋果20年 企硬我敢言
http://20.appledaily.com
|
鍾意就快D Share啦！
|
|
|