禾花雀一向是廣東人至愛，就連本港星晨旅遊早前都推出團費79元的「一雀三味宴」一天美食團作招徠，更在宣傳單張附有貌似禾花雀菜式相片，以薑葱、豉油王及椒鹽花雀作菜單。《蘋果》記者參加了其中一團，卻發現「花雀宴」竟是乳鴿，不少團友大呻搵笨。
「等陣中午食嘅係兩個星期大嘅乳鴿，中山客家人叫BB鴿做花雀。」內地導遊文仔在羅湖口岸及深圳灣口岸，先後接了23名本港團友上旅遊巴，介紹行程前先聲明「一雀三味宴」的「雀」實際是乳鴿；絕大部份為長者的團友幾乎同時爆出失望的聲音：「嘩！有冇搞錯，乳鴿當花雀！」
負責接待「一雀三味宴」中山蘆葦大觀園餐廳的侍應，對BB鴿稱做花雀則不敢苟同，「乳鴿就係乳鴿啦，禾花雀就係禾花雀，點會一樣呢？」記者多番追問下，原本指乳鴿與禾花雀不同的餐廳負責人，得悉導遊將「BB鴿即花雀」解釋後即改口稱：「乳鴿都係雀仔嘅一種！」
對於乳鴿變花雀，導遊文仔稱：「確係有客人詐型話玩文字遊戲，呢啲就係文化差異囉！不過中山客家人真係叫兩個星期大的乳鴿做花雀喎！」對於導遊的辯解，大部份團友雖然覺得「搵笨」，但因團費平都接受：「70幾蚊車出車入，又有兩餐，明知搵笨都算」不過仍有部份長者不滿說：「我真係以為係禾花雀，我都覺得俾人呃咗㗎！」記者昨日再向星晨旅遊了解，知道該「花雀宴」團推廣已結束。
記者事後在中山、順德、南海、番禺、三水等三鳥市場及客家人聚居地了解，發現答案都是「乳鴿就係乳鴿，花雀就係花雀，兩樣嘢！」
| 有團友甚至帶同本報較早前的報道來參加，不料原來禾花雀變成乳鴿。 |  不少團友事後都呻搵笨。 |  團友指星晨的宣傳單張有取巧之處。 |
 參加星晨一雀三味團友都是長者居多，多數人均稱不想追究。 |
|
鍾意就快D Share啦！
|
|
|