江華克服情緒低谷：珍惜當下
【《蘋果》專訪】現年52歲的江華，從影以來先後拍過不少劇集，其後因為在劇集《西遊記》中演唐三藏而走紅，不過最近十年他淡出幕前，原來當年因為腰患而影響生活，情緒一度出現壓力，反思過後，最後走出陰霾。為承諾而加入保險行業的他，直言每天努力學做人，「凡事謝恩，珍惜當下」更成為他做人的座右銘。
被喻為「比劉德華更加劉德華」的江華，06年有傳他因腰患導致抑鬱症而停工休養，在鏡頭前消失了近十年，江華最近被讀者經本報「爆相爆片」，發現他轉投保誠做保險。久違了的江華，昨日在沙田接受《蘋果》訪問，雖然他依然保存比「比劉德華更加劉德華」的感覺，不過言談間似乎少了一份執着。
對於當年被傳患抑鬱症，他笑着否認說：「傳聞嚟啫，當年拍完《紅拂女》喺北京宣傳，我發作得好嚴重，腰腿出現嘅問題，導致我精神好有壓力，以前諗都唔諗呢啲事，點解一個人行得走得食得瞓得，突然間會變成乜都唔得？嗰陣我習慣咗無論係坐呀、行呀、企呀，十項全能乜都係控制喺自己手度，但係突然做乜嘢都唔得，慢慢就有好多恐懼，跟住又開始諗，我係咪一世都係咁？我好驚，好擔心之後會唔會癱，咁我老婆同仔點？會唔會搵唔到食？」
■江華昨日坦言世界不停轉變，不應將習慣變成一種模式，要學習做水，融入不同環境生活。攝影：葉君海
■江華因為一個承諾而加入保險，新工作令他眼界大開。互聯網圖片
■江華曾因腰患而令精神出現壓力，幸而得太太麥潔文支持。資料圖片
「軟弱時有好多恐懼」
腰患令江華曾經變得好灰，不過他從而反思人生，他說：「嗰一役話你知，對唔住，原來好多嘢唔係你可以決定，有幾多錢又點？幾有才華同幾多人鍾意又點？有啲嘢可以令你乜都冇，我覺得搞唔清楚究竟人生係點？一個人喺軟弱嘅時候，會有好多恐懼襲擊你，之後我信咗耶穌，喺嗰段日子我唔想再拍戲，要調較自己生活，反思人生係乜，直到今日好似有一種起動感覺。」
經歷過後，江華直言目前的生活開心又感恩，他說：「其實你抬頭望一望個天，你會發覺自己實在好渺小，做人有幾叻啫？生老病死又唔可以控制到，我𠵱家有八個字成日提醒自己『凡事謝恩，珍惜當下』，呢個先係最重要，未發生嘅嘢都冇人知，諗嚟都多餘。」慢慢地江華開始想通了，他說：「我喺靜咗呢十年裏面，我學識咗反思，體會咗好多嘢，人生開心唔係好難，只係我哋唔明白，我亦唔知邊一日會再出發，所以籌備咗好多嘢，學識修心養性，從唔同角度去思考，去學習，真係得着好多。」
從沒有放棄拍電影
江華強調自己從來都沒有放棄搞電影，一直有跟投資者傾談，今次加入保險行業，原來背後有一個故事，他說：「我相信每一件事嘅出現，都有佢嘅美意。我有一個好耐冇見嘅朋友，有一日突然搵我見面，食飯嗰晚我問佢做保險做得好唔好，佢話由我識佢嗰日做到𠵱家，連續十年都係頭五位，不過佢話佢嘅團隊只係得佢自己一個，於是問佢點解唔搵人加入，最後傾傾吓佢話如果我肯加入，就會搞團隊，所以咪因為呢個承諾而加入保險。」似乎感覺冥冥中有安排，他笑說：「梗係啦，如果唔係無端端會做保險，不過我諗嘢同其他人有啲出入，主要唔係叫人去買，反而係主動同人做朋友，想識多啲人，呢個係我自己睇法。」
採訪：何慧斯
場地：沙田凱悅酒店
■江華坦言人其實很渺小，他經常提醒自己「凡事謝恩，珍惜當下」。
|
鍾意就快D Share啦！
|
|
|
