熱爆娛樂: Justin Bieber台上露底　齊昕台下喪仔 [FACE

2015年6月17日星期三

Justin Bieber台上露底　齊昕台下喪仔 [FACE - 421] 齊昕,梁齊昕,Justin Bieber,MF,

Justin唱唱吓歌突然乸起件衫，邊唱邊望住自己嘅腹肌，唔通咁唱會 high啲？不過就未見過郭富城或者韓國 Rain會咁做囉！

全知言

Justin Bieber台上露底　齊昕台下喪仔

加拿大小天王 Justin Bieber上週四（ 11日）來港出席品牌活動，身為代言人嘅 Justin當晚相當識做，喺台上又唱又跳，仲乸高件衫騷吓底褲邊同埋腹肌線條，最後當然唔少得連衫都除埋，總之就睇到班女粉絲依嘩鬼叫。

台上 Justin好識做，行出行入同粉絲碰面都會 say Hi，甚至落機當日唔介意同粉絲影合照兼簽名，不過面對傳媒追訪， Justin就似乎唔多鍾意，騷前出入酒店已經唔願望鏡頭，騷後仲搵黑人保鏢驅趕記者，唔知佢驚俾記者影到佢做乜呢？

除咗 Justin係當晚焦點之外，當晚特首女梁齊昕再次踩場成為焦點，佢仲好識搶鏡，自行帶多套衫嚟替換，係怕大汗定貪靚？全知言真係答你唔到。不過淨係知佢當晚勁集郵，集親都係靚仔添囉！

唱到興起， Justin索性連衫都除埋，成班粉絲即時嗌到癲咗！

唱完歌 high完， Justin頭也不回咁入返後台，果然有巨星風範。

3粒鐘集 11郵

齊昕好準時喺 call time現身俾記者影相，向來愛 show off嘅齊昕仲不時喺 instagram向粉絲匯報集郵成績，當晚幾乎見仔就集，不過集得嘅都係靚仔，唔係亂嚟㗎！

齊昕愛集郵，好在紅唔紅佢都照集咗先，好似呢張就有趙雅之個仔黃愷傑、天佑同埋又南。

唔知 Justin之後想去邊玩呢？佢搵咗幾個又高大又惡死嘅保鏢落車驅趕記者，仲掟水樽添呀！

Kendall老豆搶鏡

與 Justin一齊坐私人飛機來港嘅緋聞女友 Kendall Jenner，近日都要將緋聞擺埋一邊，事關佢老豆 Bruce Jenner，即係美國奧運金牌得主早前變性成功，仲做埋雜誌封面宣告「 Call me Caitlyn（請叫我 Caitlyn）」。雖然已經 65歲，不過 Bruce（或者 Caitlyn）始終想圓夢，堅決要做「真女人」！