真人騷
離大台有後台 何傲兒：爺孫戀修成正果
26歲女，外型 pure如純純兔，出街總會傍住父母，最好朋友就係家姐何傲芝，一世人淨係打過大台一份工……
本來，以為訪問何傲兒會易過食件餅，結果，呢個故事教訓我，凡事真的不能只看表面，一個下午，傲兒 BB變化萬千，其實層次極豐富。
第一粒鐘，驚青：
「我淨係應承做文字訪問，唔拍片㗎！我驚講錯嘢又俾你哋拍低吖！我知你哋一定會問，但係淨係講林生（林建名），另外一個（周子揚）就唔想提。」
嗱嗱聲調解周旋威逼利誘：「文字傳媒要錄影唔係新聞，唔好嚇我得唔得？再講，唔拍片我都有錄音，唔通熄埋錄音機咩？乖啦，你想講邊個係你自由……做咩啫你？」見她伸晒脷咬晒唇，又嬲你唔落。
第二粒鐘，蠱惑：
「唔想再提 13啜（與周子揚街頭連環吻）喇！頭先講嘅嘢可唔可以唔出？嘻嘻……原來我啱啱熄咗咪唔記得着番，你哋錄唔到喎！感情穩定我一定會公開，偷偷摸摸有咩好？不過呢一分呢一秒我真係單身！」
高潮位你話唔覺意熄咗支咪，我信唔信你好呢？話自己單身嗰句似層層，不過講完用食指指住手腕戴表位，再重覆多次：「呢一分呢一秒喺呢度我仲係單身！」，又真係吹你唔脹。
第三粒鐘，喊完突然硬淨：
「記者支筆似一把唔會流血嘅刀，我覺得好對唔住爸爸，點解我做呢行會累咗全家？其實簽唔簽都有人講，都要多謝傳媒寫完，令到爺孫戀可以修成正果……喺工作上。」
係，告別七年大台生涯，何傲兒正式離巢，短短兩個星期，由未知去向如何，到簽了賣身契俾上年至同佢傳過爺孫戀緋聞的林建名，成為大名娛樂旗下藝人。
唔只簽約儀式穿上婚紗似行禮，仲竟然識形容爺孫戀係「修成正果」，呢一刻，我真係覺得話自己又傻又天真嘅何傲兒高深莫測。
我細膽，但夠薑離開大台
幾時決定簽大名娛樂？
離開咗 TVB以後，始終一個大轉變，由選完港姐到𠵱家已經七年，都係一個好大膽嘅決定。
真係未有着落已經決定走？
真係冇着落㗎！就係諗住去闖吖嘛。
點解會決定離開？
Timing問題，一簽就簽幾年，有時落咗筆簽就冇得反悔，咁啱今次有一個位俾我諗……其實公司對我好好，但我覺得不如出去試下，唔簽經理人合約都一樣有合作機會啫。但始終我離開嘅係一個保護罩，一個對我咁好嘅公司，中間都有好多掙扎位。
你都話你細膽，又剛剛拍完一個咁有發揮嘅新劇，膽喺邊度嚟？
我真係好細膽，好容易俾人兇到，我覺得我得到好多機會，真係好難得。個個拍劇都等一個會爆嘅角色，但我呢套未拍已經好多 noise，真係多謝《波士早晨》監製關永忠。但係今次離開，我覺得我要勇敢一次，唔係第時一定會後悔。
你唔怕醜樣咩？定係唔敢推？
好多大台藝員都試過一推劇即被雪。
首先，我好少會推工作，第二，我覺得接到呢個角色係我福氣。我唔怕醜， TVB個個都係斯文靚女，個個都等緊俾觀眾新鮮感，呢個角色俾我等到係我幸運。講真，我係咩樣大家都見過，我可以有幾靚大家都想像到，但可以有幾醜，冇人見過。
呢個醜角你事前參考過咩前輩？
莫文蔚（《食神》）啦、趙薇（《少林足球》）啦，呢個妝唔易㗎。我對眼又大又圓，要黐膠紙變單眼皮一啲都唔容易，黐一塊，隔唔夠五分鐘又俾我撐番大，再試再黐、最後要黐夠三、四塊膠紙先撐到一場戲。拍完落完妝，我自己對眼都撐唔番大，好辛苦……但係又 ok喎，我 enjoy個過程。
有冇高層留你？有冇人兇你：俾咁好機會你、你夠膽走？
冇吖！我真係覺得過去呢個月我好好運，諗番其他人走……可能每個人同公司關係唔同，但起碼我唔係咁嘅待遇，走咗之後慶功宴都有叫我返去，樂小姐都喺傳媒面前甚至私底下鼓勵我。
13啜後，下次拍拖都隨心
過去 26年，你有冇做過其他咁大膽嘅事，自己都估自己唔到？
我真係好渣，我諗我最大膽嗰件事就係 19歲去咗選港姐，當年 baby fat都夠膽着住泳衣……可唔可以唔出嗰張相吖？𠵱家瘦咗好多喇……
梗係唔得，一定要出！
選港姐係你想選，定係父母、家姐叫你去選？
屋企人有鼓勵我，但第一個有呢個念頭嘅係我自己。見到港姐宣傳，又咁啱暑假，覺得 nothing to lose，實有得着，又唔會輸啲咩……但自己心理質素太差、壓力太大，搞到由報名去到決賽內分泌失調，幾個月冇嚟過 period，腫上加腫。可能我扮得好，其實真係好騰雞。
壓力嚟自邊度？
一個細路女，溫室長大未打過工，第一次走出嚟就要面對咁多傳媒，再加上我又惹火呢……選嘅時候已經好多新聞。我唔鍾意爭㗎，成日都問自己，唔係做呢行，可能去咗做幼稚園老師，過啲平靜嘅生活。
港姐嗰陣算得乜，你舊年啲新聞至真正叫惹火。
過去嗰年令我成長好多，包括好多唔係事實嘅報導。以前我以為自己捱得又夜瞓就等於適合做呢行，以前啲新聞好似百毒不侵咁，仲以為自己就係咁 strong。經過舊年洗禮，嗰下就知原來我心理質素唔係想像中咁強。
選港姐時都內分泌失調，咁舊年壓力咪仲大？
拍拖其實好閒，個個熱戀都係咁錫㗎啦，但係你就一路錫一路俾人影到晒……尷尬嘅……都係嗰句，食得鹹魚抵得渴，藝人嚟嘅，言行舉止都係小心啲。𠵱家睇番，梗係覺得拍拖好正常，𠵱家都唔係以前嗰啲年代唔俾得人知，好多情侶公開仲得到祝福。呢一刻我專注事業，但係遇到啱嘅人，我都會話俾大家知，其實偷偷摸摸又有乜咁好？呢行好多人都遲婚，我諗我專注喺自己身上，令自己變成一個更好嘅人時，更好更啱嘅人就自然會出現。
下次呢？再係熱戀，佢想錫你會唔會叫唔好？
下一次吖……隨心啦，睇嗰一下想點啦。每個人都渴望被愛同付出愛，真係遇到啱嘅人，我唔介意公開囉。
工作上，爺孫戀修成正果
𠵱家有冇拍拖？係唔係真係轉地下情呢？
如果穩定我絕對會公開，收收埋埋好辛苦㗎！我真係單身，今日呢個鐘數係真嘅。
初戀幾多歲？拍過幾多次拖？
我第一次拍拖係 22歲，𠵱家拍過兩次拖咋。人哋話入咗呢行會擴大圈子、識多啲人，但我又一直係嗰啲好保護自己嘅人，又慢熱。朋友呢幾年識咗好多，但最好嘅朋友，當然都係我家姐啦。
周子揚至係你第二個男朋友？
係吖，我哋𠵱家都係朋友。佢係一個好男仔嚟㗎。
既然咁好又會咁快分手？係唔係因為你哋兩個都係做呢行？
感情係兩個人嘅事，入面強壯，我覺得出面嘅嘢唔會打得冧。我哋分手係因為覺得唔啱，不如 stop咗佢，所以𠵱家做到好朋友。
唔只一間想簽你，點解你會揀咗大名娛樂？唔怕俾人講爺孫戀？
當然係因為前景，我係一個好鍾意做嘢嘅女仔，林生間娛樂公司俾咗足夠自由度我，又有好多新嘢俾我試……都有諗過，簽得佢肯定又俾人講，都要多謝傳媒，令到爺孫戀喺工作上可以修成正果。係唔係都俾人講，唔簽都有人講㗎啦，做呢行無論係唔係真都會跟我一輩子，作為一個藝人，惟有睇開啲。
經過過去一年，你嘅承受力的確高咗。
想唔 strong啲都難，過去一年，唔只我（被人寫），仲有屋企人……我體會到，傳媒支筆原來係一把冇血嘅刀，黑嘅嘢可以寫成白、白嘅嘢可以寫成黑。
係唔係覺得寫你都好過寫你爸爸賣女？
最 hurt嘅首先係屋企人，我有時覺得 sorry to我爸爸，點解一個好普通好簡單嘅女仔，明明同屋企人好幸福好正面，點解會俾人塑造到屋企人形象變咗咁。我知爸爸無悔，個女做呢行就會俾人寫，佢識咁諗係父親嘅偉大，但係做女……我覺得點解我一個人做，要累咗全家。
成個過程，你識林建名、混熟同簽埋約，爸爸有冇俾過意見你？
我任何嘢都會同屋企人商量，任何決定都會得到佢哋支持，但係我哋關係親密，唔應該俾人咁寫。生意都試過有困難，屋企經濟曾經試過出現難關，但都已經解決咗，唔係出面寫到咁囉！（林建名出手相救）。
咁應該識個咩對象，群埋啲咩人玩，父母又有冇指引俾你？
屋企人從來冇規定我哋，一定要咩人先至可以做朋友，我同家姐有好大自由度。我自己嚟講，識一個男士到佢做我另一半，我淨係睇緣份，唔會類型化佢應該有咩條件。因為我每個階段都有成長，都有改變，每個階段遇到嘅 right person可能感覺都唔同。
|
鍾意就快D Share啦！
|
|
|
