鄭健和
漫畫原著兼導演
鄭健和從事漫畫廿幾年，經歷港產漫畫興衰：「舊讀者係鍾意睇武打題材，後生一輩只睇日本漫畫，所以前景唔係太樂觀。」
爆 Like王
搵連詩雅含大鵰燒 《野狼與瑪莉》導演：算係佢嘅突破
連詩雅含大鵰燒，又半裸被吊起的新戲《野狼與瑪莉》未上映已話題多多，下週正式在港上映，宅男等睇喇！究竟呢套由同名港產漫畫改編嘅電影係咪真係咁激呢？連詩雅會唔會同漫畫女主角一樣大膽露點？
《野狼》漫畫原著作者兼導演鄭健和（和仔）喺香港漫畫界打滾廿多年，曾經憑超水準武打場面的《魔神傳》成名，他的《封神紀》亦將改編成動畫，至於點解要搵連詩雅含大鵰，導演話：「原著都有！」
F：點解《野狼與瑪莉》會被拍成電影？
和：本漫畫係幾年前推出嘅三期完漫畫，過咗兩、三年個監製（李建興）搵我，佢好鍾意呢本作品，覺得幾搞笑所以同我傾，初時我知唔易成事，應承住佢先啦，佢籌備咗 1年，問我有冇興趣做埋導演，都好喎！都係新嘗試吖，我又貪玩咪試下囉！除咗我仲有位導演金沛成，仲有幾位執行導演同副導演，我負責守番住漫畫嘅風格，執行上嘅嘢佢哋負責。
F：連詩雅含大鵰燒以及血腥情節係咪跟足原著？
和：漫畫都有呢場，不過一格漫畫咁多，因個角色部電話俾人攞咗，睇到裡面有張咁嘅相啫；套戲嘅劇情大致同漫畫一樣，但有個真人做就好似好大膽，觀眾鍾意官能刺激嘛，啲血呀腸呀飛埋出嚟都幾血腥。（漫畫中女主角有露點戲喎！）我覺得表達到就 ok好似都有人露點，不過唔係連詩雅囉！我又冇特別要求呢樣喎！
F：點解選連詩雅做女主角呢？
和：選角係監製負責，但有問我意見，除咗連詩雅仲有其他人俾我揀，係台灣演員，但我唔係好識其他明星，香港好似得連詩雅。佢本身梗係靚女啦，漫畫入面佢係女神，佢都有女神 feel，好多兵包圍佢，連詩雅做到呢個感覺。如果計大膽尺度，《喜愛夜蒲》仲大膽啲！呢套就難演啲，好似多重人格咁，算係佢嘅突破。有場拎刀斬人戲佢練習咗好耐，又吊埋威吔唔用替身，都辛苦㗎！
|
鍾意就快D Share啦！
|
|
|
