Kayley每朝 7點開檔，夜晚 8點至收工，有網友大讚佢捱得，仲話 Kayley以前個樣仲正添！
真面目
真人發聲 街市多靚嘢 捕獲生果檔公主 大排檔少東
行街市如果剩係買餸買生果你就錯晒！原來街市好多型男索女，頭耷耷掛住望魚望菜你會甩好多嘢！
好似上水石湖墟街市就有人稱「師奶湯怡」嘅榴槤公主，但現場睇
其實似謝安琪多啲喎；而喺北角渣華道街市就有韓 look潮男
太子爺坐陣大排檔，真係唔買都睇吓喇喂！
師奶湯怡：我未結婚㗎！
講起上水石湖墟街市，好多街坊都知道生果檔靚女 Kayley，皆因 Kayley有幾分似湯怡，今年得 26歲又未嫁人，之前仲去過澳洲 working holiday體驗生活。
Kayley同《 FACE》講，佢有專業美容師牌照，做過幾年美容，但因為 2年前媽咪腰骨勞損，惟有捨棄原本收入唔錯嘅美容工作，返生果檔幫手。 Kayley最嬲係大家話佢係師奶版湯怡：「我未結婚㗎！點會係師奶呀？唔做美容我又唔覺得可惜，呢度啲客幾好幾有人情味㗎！錢對我嚟講冇乜所謂，最緊要開心；𠵱家收入夠食，唔會餓死！」
Kayley皮膚又白又滑，原來都同生果有關：「我咩生果都食，每朝飲蘋果汁，兩至 3個啦，但我唔鍾意咬，飲咗先返工，榴槤都好補㗎！我唔食飯都會食個榴槤。」唔怪得人哋叫佢做榴槤公主
6呎韓風太子：我對 K-Pop冇興趣
北角渣華道街市有個韓風型男阿偉， 32歲身高 5呎 10吋，漂了一頭金白髮，型到爆！阿偉係熟食中心東寶小廚太子爺， 5年前老竇喺同層開咗店小二，阿偉就調過去打點一切，一身潮 look係生招牌。佢話：「其實我對 K-Pop冇興趣，打扮係自己鍾意啫，唔覺靚仔喎！個頭係呢兩年至染。」
有外國食客會專程嚟一睹阿偉風采，但阿偉話唔覺有女仔想追自己，況且已經有個 10歲囝囝，𠵱家只想專心搵錢養家：「我都有同佢去吓旅行，呢排好忙少咗時間陪佢，有時帶佢上嚟玩吓咁」阿偉係廿四孝老竇，大家去食飯唔好諗咁多喇！
|
鍾意就快D Share啦！
|
|
|