全知言
梁朝偉最經典的乜乜乜
剛剛獲法國文化及通訊部頒授「法國藝術與文學軍官勳章」的梁朝偉，近日自爆當年係被周星馳氹佢入行！擁有一對電眼嘅偉仔，好在冇繼續做電器銷售員，唔係點會有呢個一代宗師出現先？
電影電視劇加埋過百部，原來 52歲朝偉仲出過碟㗎！咁多樣作品，真係好難揀一樣最經典喎！
何傲兒：《東成西就》勁搞笑
印象最深刻係《東成西就》，嗰場講佢食咗有毒嘅嘢，個嘴變到好厚，好似孖潤腸咁！好佩服佢演戲一時咁深情，一時又可以搞笑；同埋佢嘅眼神好似過到好多 message俾你，就算佢唔講嘢，都可以吸住你！
王菀之：《無間道》最深刻
我最鍾意同欣賞梁朝偉前輩嘅作品係《無間道》，其實好多電視劇都鍾意，不過《無間道》入面其中一個表情，我真係好深刻，就係當黃 Sir喺大廈頂跌落嚟，佢啱啱趕到現場一望！嗰個影帝嘅表情，真係瞬間令我戥佢緊張得嚟自己又喊，喊完又驚俾啲臥底發現我喊，所以我又唔可以喊，好緊張！
黃美棋：《鹿鼎記》暗 chok型
我最欣賞梁朝偉套《鹿鼎記》，因為佢個角色係好開心，有好多美女包圍，同埋佢英俊得嚟有少少 cool， cool得嚟又有啲瀟洒嗰下犀利！佢戲好就唔使講，我最欣賞佢嗰種 chok唔係明 chok，係暗 chok，好有型！
陳嘉桓：《新紮師兄》好特別
我最喜愛嘅梁朝偉作品係《新紮師兄》，覺得佢好有型；另外都好鍾意《花樣年華》、《春光乍洩》，呢啲好特別！
周家怡：〈你是如此難以忘記〉有感情
我最鍾意梁朝偉首〈你是如此難以忘記〉，細個去唱 K聽人唱，佢唱得好好，好有感情，我好記得個 MV！
街坊眼中的梁朝偉：孖潤腸嘴最經典
好得意
《東成西就》呢套戲好搞笑，同埋梁朝偉一反做開嘅角色，喺戲入面俾人整到孖潤腸咁，好得意！
最愛《花樣》
《花樣年華》，同埋以前好鍾意睇佢啲笑片，好似《東成西就》！另外《春光乍洩》都好破格！
劈友搞笑
我揀《亞飛與亞基》，套戲一開頭講佢爭啲俾大佬斬死，佢劈友嗰段好搞笑！
|
鍾意就快D Share啦！
|
|
|