贏咗冇禮物，仲要陪占奴搞場大龍鳳，十足港姐上身揮手環繞宿舍一周，認真夠 gag！
Main Camp
唔玩低俗 占奴踩入理大揀 gag王 gag后
DJ阿占（甄子康）同阿奴（唐劍康）為咗籌備嚟緊 8月商台台慶嘅重頭 gag騷《騎騎騎大會串》，四出收集爛 gag，除咗向電台聽眾收 gag，上週二(16日)佢哋仲殺入出晒名多靚仔靚女兼玩得超喪嘅理大宿舍勵志堂搵爛 gag王。
唔好以為勵志堂宿生只係一味癲喪，講起 gag一樣好有水準，搞到當日兼任爛 gag判官嘅占奴及台下同學笑到有腹肌！
譚景洋（勵志大隻林峯） 21歲 紡織及製衣 Yr.3
打過乙組南華籃球隊嘅譚景洋（阿 Ken），睇佢個樣黑黑實實，肌肉大大嚿，難怪被同學稱為「勵志大隻林峯」。咪以為佢四肢發達，頭腦簡單，一上台已經大放冷笑彈：「知唔知點解啲同學搵我上台搞 gag，因為我可以搞埋「肌」。」說罷還親吻了自己手臂一下，連記者都睇到滴晒汗，但就成功吸引全場同學尖叫（特別係女宿生），其實大隻林峯事前都有同記者講佢為咗今次爛 gag比賽，花咗好多心機上網搵資料，可惜最尾佢個 gag玩粗俗，爛 gag判官占奴就唔多 buy，最後以一分之差落敗。
比賽爛 gag 關你叉事
李亞鵬同王菲離婚，有位王菲粉絲走去問位禪師究竟世上有冇真愛？禪師俾咗一隻叉佢參詳，粉絲點都估唔到，最後禪師好認真望住佢講：「青年，人哋離婚，關你叉事咩！」
陳壹竣（勵志羅嘉良） 21歲 電子及資訊工程學 Yr.3
勵志堂堂主陳壹竣外形木木獨獨，被宿生叫佢做「 A貨羅嘉良」。似唔似就見仁見智，不過 A貨羅嘉良搞起爛 gag一啲都唔失禮：「今次都係俾同學迫上台，但我上嚟唔係為搞 gag，因為 I don't for gag（ forget）。」全場鴉雀無聲幾秒之後好識做咁歡呼雷動，記者感受到呢位主席平時應該好受同學歡迎，可惜之後佢搞嗰個 gag原來阿占阿奴已經聽過，相對地有啲失色，加上阿奴話搞 gag個畫面有少少兒童不宜，所以最尾都輸咗俾勵志葉蘊儀。
比賽爛 gag 塞提子入 pat
有 3個人去非洲旅行俾食人族捉咗，族長叫佢地搵 100個生果， A搵咗 100粒提子，族長就叫佢逐粒塞入 pat，塞到 100粒就放佢走，當佢好努力塞到第 99粒，突然忍唔住笑將全部提子噴番出嚟，族長就煮咗佢嚟食。上到天堂天使問佢做咩咁都忍唔住笑，佢就答：「因為我見到我個朋友拎咗 100個榴槤返嚟！」
陳曉彤（勵志葉蘊儀） 21歲 產品及工業設計 Yr.3 勝
首先打響頭炮係人稱「勵志葉蘊儀」（身高最似）但自稱「勵志 angelababy」嘅陳曉彤（彤彤），自 high足成分鐘，全場同學惟有陪笑，見佢身高同小儀差唔多（最多得 150cm），不過佢個爛 gag確實幾 fresh，同佢嘅甜美笑容簡直襯到絕，結果獲評判阿占阿奴大讚個 gag老少咸宜又夠爛，成功奪得 gag王寶座，當占奴幫佢戴上后冠，勵志葉蘊儀仲香港小姐上身向群眾揮手兼大講得獎感受：「我要多謝我屋企人同一班同學，全靠佢哋平時無厘頭嘅話題都可以講一大餐！」
比賽爛 gag 玩黐脷筋
我細個上英文堂，個老師教講 Thank You，佢話：「如果你驚自己唔記得點讀，就擺條脷喺兩棚牙中間發音」點知我返到屋企真係唔記得咗，剩係記得老師教擺條脷喺兩棚牙中間發音，結果我同媽咪講：「多爹！（痴脷筋 mode）」
占奴爆： Do姐先係 gag后
見慣大場面嘅占奴，一般爛 gag嚇佢哋唔到嘅！喺二人心目中， gag后唔係勵志葉蘊儀，而係 Do姐， Donald話：「 Do姐搞嘅係英式幽默，佢知道我係星戰迷，就揀咗本星戰英文雜誌畀我，之後佢話：『你都唔識英文，不過淨睇圖都得！』全場 O晒嘴！」
|
鍾意就快D Share啦！
|
|
|
