2015年7月10日 星期五

誰人不識娃娃舜,便稱英雄也枉然 [忽然1周 - 1041] MW,



靚抽王

誰人不識娃娃舜,便稱英雄也枉然

講到香港嘅網絡傳奇,點會唔講到娃娃舜?冇上慣網嘅人可能唔知,所以我先同大家講佢有幾巴閉:

傳奇緣起

娃娃舜(因其演出《娃娃看天下》,故有此名),全名黃宏舜,現名黃學忠。曾經喺《都市閒情》 2001年 9月 7日一集「鬥戲連唱鬥一番」演出,以其獨特嘅 MK造型,超卓嘅唱功,劃時代嘅抵死甩 beat舞步,順利吸引大眾嘅注意。加上當日嘅評判江華指出娃娃舜衰在太有自信,更添傳奇色彩。此片段在網絡上廣傳,點擊率直達 75萬。更有網民製作惡搞片段,以木村拓哉同娃娃舜作深層次學術比較,力證「靚仔贏在起跑線上」,就算跳埋同一隻舞,個效果都會差天共地。

娃娃金句

娃娃舜嘅事件,衍生出一系列改圖同埋網絡金句,例如:「沒有他,很想去捕捉他」、「你知唔知你衰咩,你就係太有自信!」、「蝴蝶第十萬個心願……」等。

舞王復出

由於娃娃舜太過傳奇,高登巴打曾經人肉搜尋佢嘅芳蹤,可惜多年來遍尋不獲,仲有傳佢喺沙士嘅時候中咗疫症……正當大家以為香港痛失一名音樂天才之際!近日又出現番曙光,網上流傳娃娃舜嘅臉書,仲有圖為證,表示佢已為人夫,仲喺留言度發表言論,對於大家嘅厚愛,佢覺得「大家非常俾面」。喺新流出嘅圖片度,我哋睇到娃娃舜同以往一樣,一樣咁有風采,中間仲夾有一張喊豬相。好多粉絲即刻喺佢嘅臉書上面留言,表達佢哋對娃娃復出嘅期望。嗯,睇嚟我哋個樂壇已經悶得太耐,希望經過那些年,娃娃舜能夠繼續娃娃愛天下,撐起香港樂壇,等阿姐可以返屋企唞吓。

網絡傳奇

網絡世界,遍地花生,網絡傳奇為你介紹花生含量最高嘅網絡資訊。

鍾意就快D Share啦!