羅鈞滿和張文采曾經愛到如膠似漆，奈何羅鈞滿「喜愛夜蒲」，最後因為暗溝空姐而東窗事發被女友飛。圖片
娛樂喧
遭張文采怒掟 羅鈞滿爛醉女照曝光
冇事業、衰偷食、更愛飲醉生事的男人，早飛早着！ 31歲奀星羅鈞滿，最近被指夜蒲偷食空姐及樂瞳，遭新聞之花張文采狠飛，四年情玩完。張更在 facebook宣告分訊︰「依家我重生喇！」
近日有周刊爆分手原因，指羅鈞滿今年二月飛韓國夜蒲，因為飲醉酒出事，得罪當地社團大佬，搞到上警局，最後無綫要出動律師營救，四月才返港。其實，去年開始，羅鈞滿與張文采濃情轉淡後，愈蒲愈過火，經常爛醉溝女。據在夜場認識他的𡃁模 A爆料，醉貓羅鈞滿不時夜場𠝹女，風流快活，完全當女友冇到！
今年 5月，有傳媒拍得羅鈞滿在尖沙嘴一間酒吧溝長髮女，高登仔後來更將長髮女起底，原來女子叫 Sylvia Lam，任職空姐。其實羅鈞滿溝女一向漁翁撒網式，就連「稱兄道弟」的樂瞳也不放過，據知近日兩人過從甚密玩曖昧。咁多女埋身，張文采梗唔忍啦。
新歡膺高登女神
Sylvia Lam任職國泰空姐，因為經常在 Instagram上載惹火泳衣相，被高登仔稱為 ig女神，其 ig有超過 1萬 3千多名追蹤者。不過日前她發現被起底後，隨即將戶口改為私人。
3月 20日羅鈞滿未出事前，還開心 chok住看棒球賽，到了 4月 4日被扣留在韓國，立即滿臉鬚根，一臉憔悴。
爛蒲爛飲𠝹女
冰封三尺，非一日之寒。羅鈞滿自去年開始沉迷蒲夜場，每每玩到通宵達旦才返家。有蒲友報料話︰「其實唔只個空姐，羅鈞滿舊年成日上尖沙嘴同鑼銅灣嘅私竇玩，我都撞過佢幾次。佢次次都飲到面紅紅，啤酒一打打咁嗌，飲得好狼，仲會即場𠝹女。」蒲友更提供羅均滿在夜場飲到面紅紅及𠝹女的照片。
其後，蒲友向本刊提供當晚與羅鈞滿調情的𡃁模 A電話。本刊致電𡃁模 A，她憶述當晚情況：「當晚我哋透過朋友認識，我讚佢（羅鈞滿）喺《星夢》唱得好，佢好開心，主動請我飲嘢，然後問我攞電話，之後仲攬住我條腰。我當時唔知佢有冇女朋友，咪試探佢：『你唔驚女朋友嬲？』佢當時就話『黐線！』不過之後佢趁我去廁所就𠝹其他女，搞到我好嬲！後來我知佢有正印，佢再打電話約我我都冇睬佢啦。」
陪空姐赴韓惹禍
羅鈞滿爛蒲𠝹女頻頻斷正外，近日又有周刊大爆今年初他赴韓時就因夜蒲醉酒搞到很大鑊。
據知今年二月，羅鈞滿與空姐新歡 Sylvia赴韓遊玩。 Sylvia因為工作關係先行離開，剩下羅鈞滿自己留韓玩多兩天。豈料心野的羅鈞滿因為與朋友落夜場玩飲大咗，竟然惹到當地社團大老的女友，社團大佬嬲爆，要他賠錢道歉，更聲言唔賠錢，就告發他影女人裙底。羅惟有致電返港撲水擺平事件，可惜數目籌唔夠，最後要驚動無綫出面。
雖然羅鈞滿在無綫只是奀星，不過有高層余詠珊照，余出動公司的律師及經理人赴韓交涉。經過兩個月周旋，羅鈞滿終於甩身返港。
對女友慳得就慳
其實羅鈞滿與張文采拍拖以來，因為羅的收入有限，與女友的拍拖生活慳得就慳。濃情轉淡後，兩人已甚少去旅行，連街都少出，難怪張文采愈來愈冇癮。在韓國出事未幾， 5月傳媒又斷正羅鈞滿與空姐 Sylvia夜蒲，加上張文采發現羅與樂瞳又過從甚密，難怪她心淡決定斬纜。儘管羅鈞滿缺點多多，但張文采為了好來好去，對外一概封嘴。被問到分手原因是否男友花弗時，她只謂︰「要講嘅都講咗，冇嘢補充，多謝關心。」
雖然張文采去意已決，但羅鈞滿早前仍戮力箍煲，更在 ig揚言︰「凡事有轉機。」不過本周二（ 7日）他出席新劇活動時卻轉口風話：「佢（張文采）都有寫出嚟啦，我都冇補充。（係咪因為花弗或第三者？）唔關事，係大家去行自己嘅路會比較適合。」箍煲無望的他，跌落地都要揦番拃沙。
搞「兄弟」樂瞳
樂瞳雖然與羅鈞滿「兄弟」相稱，不過有報道指兩人過從甚密。對於緋聞，樂瞳本周三（ 8日）馬上劃清界線：「完全冇行埋，我同佢從來冇單獨約會過，只係合作過《點解阿 Sir係阿 Sir》。次次都係 K4成員食飯，之前我哋有 gathering，上周我喺公司撞過阿 Moon（羅鈞滿），大家趕開工，只係打招呼。」
屢惹官非
羅鈞滿不但寸嘴招來很多仇口，亦曾兩度被控犯交通條例，惹來一身官非。
違例泊車
13年 4月因違例泊車被控，同年 11月羅鈞滿成功舉證事發路段為私人路段，獲判罪名不成立，毋須繳付 320元罰款。
|
鍾意就快D Share啦！
|
|
|
