霆鋒遭蟹箝爆缸 身家反彈1億
近日股市反覆向下，連帶謝霆鋒旗下的漢傳媒（491）亦大上大落，昨日以0.69元收市，比開市的0.42元大升64%，身家漲回近億元！而霆鋒前日在上海拍節目時不慎被蟹箝穿手需送院求醫，經急救下已無大礙並繼續拍攝，總算是柳暗花明。
中港股市近期風起雲湧，恒指日日插水，幾多重磅股都跌到損手爛腳，市場上充斥着一片愁雲慘霧。謝霆鋒去年斥資1.23億港元入股成為最大股東的漢傳媒（491）亦不能幸免，曾高見1.36元的股價前日狂跌到0.42元的收市價，手持3.5億股的他，帳面身家被蒸發了超過三億元。
禍不單行的是，正身在上海為《12道鋒味 2》拍攝的霆鋒，前晚本來繼續發揮大廚本色，下廚煮大閘蟹，可惜遇着大閘蟹「垂死掙扎」，以蟹箝夾穿霆鋒的中指，頓時令他血流如注，嚇得在旁的經理人霍汶希（Mani）立即帶他到當地醫院急症室求醫。隨後Mani在微博留言：「霆鋒的手指被箝穿了，大閘蟹太狠了！」
開刀取出異物
幸好霆鋒經過一晚的治理後，其傷勢已無大礙並繼續拍攝。Mani受訪時稱霆鋒事發後入院照X光，醫生建議他需接受開刀手術取出傷口內的異物。她說：「已經搵到異物出嚟，冇縫針，但要打破傷風針。」並憶述事發經過：「霆鋒想解隻蟹啲繩，一解隻蟹就本能反抗，一箝就箝穿佢中指。霆鋒被隻蟹箝住時，強忍痛楚幾分鐘，直至拍攝到最後一場。捱咗成個鐘先去醫生度，手指係穿咗個窿，最後打咗破傷風針，醫生話唔可以濕水，否則會感染同發炎。」
從照片中可見霆鋒受傷的一刻，手指血流如注更嚇倒身邊的女拍檔。另外兩張則見他身在醫院等候及進入手術室前的情況。雖然十指痛歸心，但霆鋒仍保持冷靜。手傷無礙之餘市場方面又有好消息，公司股價在前天插水後，昨日反底回升，收市價報0.69元，較前日低位0.42元反彈達64%，身家漲回約9,450萬元，相信身在上海的霆鋒亦會暫時忘卻「穿指」之痛。
X光片被放上網
一眾粉絲擔心霆鋒傷勢之際，竟有缺德之人將他的病歷、X光片及病人編號放上網。當霆鋒得悉此事後，即透過Mani的微博發文譴責：「其實每個人都有私隱也擁有保護私隱的權利，希望尊重自己尊重別人，停止侵犯私隱行為！～～謝霆鋒」Mani亦同聲斥責發布者行為不當：「大家請仔細看清楚文章，霆鋒作為一位公眾人物受傷的消息流出是非常正常，但並不代表可以把霆鋒的X光片及病人編號公開上網！而我作為經理人也只是希望在自己公眾平台分享一些自己的感受而已！」
文：音樂組
|
鍾意就快D Share啦！
|
|
|
