上周六（ 4日），譚小環與蔡強榮到鯉景灣食飯，飯後兩人手拖手海濱漫步，譚小環更頻頻露出笑容，應該雨過天青。
打頭陣
斬老公爛桃花 譚小環講掂數開新舖
女人有本事，點會驚男人起飛腳！
42歲的港姐冠軍譚小環，其 50歲有米老公蔡強榮（ Eric），於上月中被周刊影到疑似背妻偷食，但小環卻臨危不亂，力撐老公，更謂︰「小菜一碟啫。」
小環咁淡定，皆因她獨攬家中財政大權。原來，兩人現居市值三千萬的半山壹號單位，乃小環家人持有。上周六（ 4日），本刊拍得小環與老公坐住 470萬的法拉利，從寓所到鯉景灣餐廳撐枱腳。其間小環攞出一大疊租盤文件與老公商量，原來兩人打算再於尖沙嘴開魚蛋檔分店。小環知慳識儉又識搵錢，老公想作反？幾難嘞！
譚小環同蔡強榮（ Eric）結婚快八年，兩人一直恩愛，不過上月卻爆出他背妻拖女偷食。報道出街後， Eric得小環信任兼力撐。對於老公偷食，小環當時說：「我百分百信我老公，呢件事冇影響我哋感情！反而仲更加鞏固。」
買車要老婆批准
小環唔驚老公作反，皆因她掌握財政大權，現居市值三千萬的半山壹號高層單位由譚家持有外， Eric所買的 470萬法拉利亦要經小環點頭才可買。小環話：「佢知我鍾意呢啲跑車，所以先去買，要我贊成佢先敢買囉！哈哈……如果唔係我咿咿哦哦佢㗎！」
上周六（ 4日）黃昏 5點， Eric揸住「二奶」法拉利，載住大婆小環由寓所出發到鯉景灣的 wildfire撐枱腳。其間小環忽然取出一大疊租盤資料，與老公密斟半小時。
食飽飽後，兩人在附近的海旁長廊拍拖漫步，又頭貼頭玩自拍，儼如小情侶。沿途不少人認得小環，跟她打招呼。半小時後，他們取回法拉利，返回自己銅鑼灣的魚蛋檔「渣哥」。小環落舖後變回魚蛋妹， Eric則在舖外陪老婆開工。大熱天時，怕熱的 Eric只好站在舖外幫手。
尖沙嘴開分店
據知譚小環的魚蛋檔愈做愈旺，有傳去年盈利達數百萬，令小環雄心壯志，兩個月前銳意在尖沙嘴再覓舖開分店。而小環睇的租盤由 300呎至 500呎左右，租金由 13萬至 20萬不等。
小環密友透露︰「唔好睇小環成日掛住做嘢，其實佢好醒㗎！佢知男人有錢會身痕，加上佢老公做保險搵到，大把女人黐埋去。佢對老公只會用軟功，唔會煩佢。所以 Eric成日讚小環慳家識揸數，好放心將啲錢俾佢打骰。佢哋依家住緊層樓係 Eric送俾老婆嘅結婚禮物，自己都冇名，目的係向老婆派定心丸啫。依家小環嘅生意賺到錢，更加話到事啦。」
每月皮費 30萬
本周一下午，小環與媽咪齊齊落舖打點，只有百多呎的「渣哥」，租金 11萬，連四、五名員工及燈油火蠟，保守估計每月開支最少三十萬。小環直認：「至少都要呀！托賴開張到依家，生意應付到開支囉！（去年盈利達數百萬？）係有盈利，幾多唔講啦，順順利利囉！」
再問是否尖沙嘴開分店？她說︰「近呢半年我哋不停去睇舖，但係有啲舖頭性質唔啱做飲食，有啲租金太貴！所以依家未扑槌，係想開尖沙嘴分店。（老公打本？）我呢啲女人仔冇本錢，當然係佢出錢」
最後，問到是否手揸財政大權？她甚為避忌︰「部分老公俾家用，我咪儲起佢。（依家住緊層樓係咪你㗎？）咁私人嘅嘢唔方便答你，總之住嗰度係同老公一齊揀嘅。」
對於老公之前的溝女新聞，小環一笑置之：「呢啲小菜一碟啫！唔會影響我哋，但都有提醒佢以後避忌啲！」
而同場的譚媽媽，亦開腔力撐 Eric：「呢個女婿對我哋好有心，成日同我哋去旅行。個女搵到個咁嘅老公，都算係咁」
一段婚姻怎會沒暗湧，聰明的女人最懂得大事化小，小事化無。譚小環深明此理，加上手握財政大權，當然冇有怕了！
老婆揸數
為了令老婆安心，唔少明星老公都會將財政大權交俾老婆負責。老婆有得揸數，自然唔擔心老公唔識返屋企啦。
愛的車牌
男女之間的感情，除了用口講，用車牌亦都可以表達「我愛你」呢個意思，唔少名人車牌的數字及英文字均是他們的愛的告白。
李嘉欣夫婦合體
許晉亨（ Julian）及李嘉欣（ Michele）的車牌是「 JM」，取自兩人英文名的字頭，簡單地表現愛意。
大劉掛住甘比
大劉俾甘比用的座駕車牌是「 I MISS U」，佢講到明掛住甘比，甘比仲唔冧咩。
Eason濠縈最「 7」
陳奕迅生日在 7月 27日，徐濠縈則在 3月 7日，故他們多輛座駕的車牌都有「 7」字。至於車輛的英文字頭則偏愛「 HY」，因為是徐濠縈英文名（ Hilary）的簡寫。
明星專撈食肆
飲食業生意難做，不過好多明星仍然甘願投資，茶仔、火鍋店、甜品舖都是眾星之選。
|
鍾意就快D Share啦！
|
|
|
