羅霖以 50歲之齡拍寫真，打破寫真集年齡界限。
娛樂講呢啲
妹妹、姨姨與嬸嬸
書展出寫真向來是𡃁模界和宅男界每年的最大盛事，可是多年來一個個倒模樣貌加眾多如有雷同實屬雷同之動作甫士，已叫人睇到悶；幸而今年寫真界人才輩出，既有本地薑，也有台灣幫，更有強國派，年齡層由六歲妹妹去到三十歲姨姨，再到五十歲的嬸嬸都有，終於打破悶局令人眼前一亮。
先說六歲「美心妹妹」 Celine，擺明賣萌，又有韓國靚景，雖然小妹妹言談和經歷已經肯定不止六歲，但勝在夠「打耳」又夠正氣，書展人買我買，買多本責袋應該唔成問題。
羅霖嬸嬸也是巧奪天工，五十歲 keep得像三十，就算明知有 PS都令人嘆為觀止。 PS呢家嘢咁好玩，十五歲都會做啦，何況五十？她打破的不僅是出寫真集的年齡界限，還有我們對寫真集的包容度。早幾年周秀娜不過玩刷牙，那幾滴牙膏猶如大殺傷力武器，抨擊她的人把她鬧得體無完膚。如今羅霖年屆半百又是三子之母，但因為由闊太變平民，受過家暴，現在要搵錢養家，背景故事夠晒曲折坎坷，贏晒同情分，就算行性感也是正評居多，真令人意想不到。
十八廿二出寫真，叫天經地義；六歲和五十歲出寫真，也可以叫有噱頭；唯獨是三十歲仍執着地堅守崗位，就頗令人𢱑頭。黃榕姨姨出道超過十年，乜都撈過下，內衣泳衣全都影過，寫真都出過五本，由沒有𡃁模年代走到去後𡃁模年代，以為她老早收山退位讓賢啦，原來今時今日仍然堅持繼續。講青春，她不及台灣雞排妹；講身材，比她勁的大把；講韻味，又不及羅霖；只見她把心一橫玩郊外全裸，這種不屈不撓的敬業樂業精神，真令人佩服。如無意外，出年應該可以繼續見到佢。
𡃁模年年有，寫真年年出，最後邊個跑出，大家最後又會記得邊個，真係講彩數。今年有啲連名都唔知點讀，叫人點記？都係羅霖好嘢，話題女王非佢莫屬，薑果然是愈老愈辣。
|
鍾意就快D Share啦！
|
|
|