靚抽王
搵邊個上《蒙面歌王》好？
早幾日李克勤蒙住塊面上《蒙面歌王》，大家都質疑評審巫啟賢扮晒嘢，冇理由唔認得李克勤。而李克勤就話：「唔通一開始就踢爆咩……」成件事花生遍地，所以話，呢啲咪成功地製造話題囉！好睇就好睇在呢度吖嘛，唔通真係聽佢蒙住面唱歌咩？既然係咁，不如幫呢個強國節目諗埋請啲乜嘢人上去可以達成乜嘢目標啦：
目標：評判一致讚好
既然目標係評判一致讚好，即係話要搵個真係唱得嘅人？錯喇！音樂嘅嘢好主觀，梗係會有人覺得好，有人覺得唔好，所以問題唔係唱功，而係地地地地位！想評判一致讚好，一定要搵佢！去片：「經過那些年~~~~重回那天的暑假~~~」你諗吓，阿姐唱歌唱到大家心理由不平衡化為平衡，觀眾們心都離一離，加上佢喺演藝圈同埋人大嘅地位，你班蛋散夠膽批判佢嘅唱功咩？
目標：未出聲已經人人認得
李克勤唱歌一出聲就認得，咁有冇一啲人係未出聲都已經認得？有！就係近排再戰江湖嘅蛇舞狀元娃娃舜嘞！大家都知，佢才華橫溢，只係差一個機會。大家可以想像吓，佢一上到台，音樂一起，歌都未唱，佢已經戴住個洋娃娃面具跳起舞上嚟。而佢嘅舞姿，係米高積遜之後萬中無一嘅第一人，試問有邊個唔認得佢吖！咩話，你話佢喺強國冇人識？你都黐線嘅，咁咪當開佢哋眼界囉，橫掂強國人成日都開我哋眼界㗎
目標：唔使俾錢之餘仲有錢收
有人話李克勤收咗 750萬先上去做節目，而李克勤竟然否認喎，即係個節目係慈善活動嚟嘅？果然係送禮勤呀吓！點都好，如果真係冇錢俾又想搵人上去，我哋都有好介紹㗎！就係「平凡像我也於身邊」嘅福仔，顏福偉嘞！大家都知佢係白花油王子，俾錢拍廣告都係為咗自己有機會唱首主題曲，咁話唔定佢上《蒙面歌手》，唔使收錢之餘仲肯俾錢贊助㗎（唯一問題係驚人認錯佢係宇宙最強或者陳振聰啫。）！
S橋王
每期 S橋王幫娛圈偽人偽事度橋脫身，你知啦，呢行好複雜，有乜事俾人捉到正，好大鑊㗎嘛！不過唔緊要，我哋會為你出謀獻策嘅！ Super~~
撰文：娛文樂
|
鍾意就快D Share啦！
|
|
|
