周潤發獄搏 炸高12米
周潤發為王晶新片搏到盡！日前親身上陣拍攝《賭城風雲III》的一場大型爆炸場面，被吊高約十二米的他，全程從容不迫，反而在旁等他拍攝的發嫂、導演王晶等，均緊張得屏息靜氣，當完成一刻，眾人才鬆一口氣！已「登六」的周潤發，除外型愈來愈後生，還擁有強勁的魄力與膽量，令人折服！《賭III》將周潤發電影經典造型「逐個捉」，除《賭神》高進之外，周潤發還將28年前《監獄風雲》鍾天正一角重現，大晒經典！
國際巨星周潤發去年於王晶執導的電影《賭城風雲Ⅱ》尾段，有一幕以「賭神」高進造型擺出經典甫士，成了該片亮點之一，估不到，在新一集《賭城風雲Ⅲ》內，繼續搞驚喜，將1987年經典電影《監獄風雲》鍾天正（阿正）一角在28年後重現銀幕，這些年來，不少電影都喜歡翻拍《監》片鏡頭，如今由周潤發親自演回這經典的一幕，實在教人期待！
發嫂睇到好緊張
不過，周潤發的驚喜豈止一個，已經「登六」的他，更親身上陣，應付一場被吊高約12米高空的大型爆炸場面，這場戲日前於邵氏片場拍攝，周潤發率領演員張家輝、吳志雄、陳奐仁、小肥等，於搭建成大型監獄場景中拍攝一場重頭戲，穿上監獄服重現《監獄風雲》造型的周潤發需要被「炸彈」炸到12米高空，拍攝前先由替身試位，之後周潤發親自上陣，被威吔吊高約12米高處，戲內還要不停扮驚掙扎，凌空踢腿踢到鞋都甩，相當驚險！而拍攝期間，一班在場望住周潤發被吊高的台前幕後人員，都緊張得屏息靜氣，尤其發嫂更十分緊張，不過，周潤發全程表現從容，還連續拍了兩take才落地，面不改容，並說：「如履平地呀！唔怕，飛天遁地都係咁，好安全嘅，九十幾人望住。」
搞笑為後輩起朵
對於新片將《監獄風雲》經典重現，周潤發表示：「好耐冇返呢個監房嘞。王晶領導下咩都諗得出，我哋肉隨砧板上，成套戲都係搞笑，冇咩認真戲，認真就唔係王晶啦。今次仲有少少似高進咁扮吓傻。（辛苦？）好輕鬆，嘻嘻哈哈又一日，娛人娛己心態就very good。今次多咗好多演員仲有我偶像張學友，好開心！佢做我情敵呀，好好睇又期待。」
周潤發一向親民，拍攝當日在片場滿場飛，還介紹演員曾國祥為「粗口影帝」，又指王君馨係「歌后」、徐偉棟係「大俠」，令一班後輩相當興奮！此外，周潤發夫婦更非常貼心地於片場一角，搭建一間「發記士多」，令劇組人員無論甚麼時候肚餓，都有食物醫肚，周潤發笑言：「係呀，間士多都幾揼本（o架）！雖然裝修簡陋啲，但都食得兩嘴，好受歡迎（o架）！為大眾謀福祉，希望佢哋鍾意，我第時喺演藝事業外發展呢樣，開幾間發記士多，做食神！（你個樣好似又後生咗！）係呀！我整過嚟呀！上山搵高人指點吓就瘦喇！」
文：影視組
|
鍾意就快D Share啦！
|
|
|
