全城熱爆的娛樂八封新聞 & 時事趣聞 & 生活 + 趣聞
因為合作拍港台劇，譚小環同邵仲衡最近經常行孖咇，兩個啱嘴型到一杯嘢兩份飲。上個禮拜，小環帶咗大佬孝去參觀佢銅鑼灣個魚蛋檔，兩個生招牌戙咗响度傾咗陣，之後再上咗去希慎商場 tea涼冷氣。
Hea到近六點，小環就同邵仲衡一齊去搵番老公蔡強榮。兩個男人見到面，企喺條街雞啄唔斷好好傾，熟到咁，難怪小環同大佬孝行得咁埋，蔡強榮都唔緊張。又係喎，邵仲衡一向都有做開生意，小環又準備開分店，預埋大佬孝入股玩一份，都好喎。
小環帶邵仲衡去睇吓自己個檔口，大佬孝好有興趣俾晒意見，又同老闆娘喺魚蛋檔自拍。
生招牌打孖上，成功引來兩個長髮後生女幫襯。
參觀完檔口，再去飲下午 tea，邵仲衡紅燈照過馬路，但俾小環掹住；入到商場， fans生擒大佬孝，笑晒傾咗幾句。
小環老公蔡強榮同邵仲衡原來都好熟，難怪佢放心俾老婆跟大佬。
撰文︰八珍nextplus.nextmedia.com
