為救妻將積蓄使到七七八八的艾威，希望靠演技在影圈有出路。
探熱針
超級黑仔 救妻花光百萬積蓄 艾威現紅色警示
港視攞唔到牌，已約滿的艾威失業，加上太太割掉十四磅重子宮巨瘤後病情告急，隨時需要換肝換腎保命，艾威禍不單行，撞埋車！有出冇入，靠積蓄度日的他為保住老婆條命，三次大手術使清百萬積蓄，艾威坦言，生活已發出紅色警示。
為咗老婆頂住
低處未算低的艾威，大條道理怨天怨地，但他仍然一笑置之，全因要集中意志陪老婆捱過一關又一關，根本不容被環境挫折打敗。
「之前有套電影搵我，有成四十組戲，返內地拍三個月，諗住正呀！點知劇本出第二稿，監製話個角色 cut咗唔好意思！要數有幾黑仔，真係由一數到十都有。心情的確有一下子沉一沉，但我有個信念，就係一切嘅挫折，都係上天安排，要令我變得更加強大，用最正面態度去面對挫敗。」艾威仍然笑得出。
兩年來，靠積蓄生活，更為保住老婆條命而傾盡所有。
「太太個病真係估計唔到，人算不如天算，半年喺私家醫院做咗三次大手術。我有諗過，遲唔發早唔發，點解係呢個時候，所有嘢同一時間發生，個天竟然同我開個咁大嘅玩笑，但就算點唔開心，為咗老婆，我一定要撐住。
「嗰段時間，日日煲湯帶去醫院，撲來撲去。做完割瘤手術後，老婆個肝發大了三、四倍，腎臟亦脹大一倍，醫生話最壞打算係換肝換腎。當刻要做嘅，係我一定要身體健康，就算冬天我都堅持朝朝跑沙灘；第二要保持心情開朗，唔可以愁眉苦臉，仲成日扮電話鈴聲氹老婆笑。嗰陣我架車泊喺醫院停車場都可以俾人撞爛，但院方睇番錄影片，又話冇發現有人撞我架車，黑到爆，老婆同車都入廠。」
整車都冇錢
一關一關捱住過，只要老婆執番條命，艾威說錢財身外物。威嫂最後選擇中西合璧，逃過換肝換腎危機，已逐步康復。
對於花盡積蓄，艾威說：「同港視一樣，已發出盈利警告。老婆三次大手術使咗過百萬，以前有兩架車，其中一架十幾年（開篷 Benz），壞咗都唔再花錢整，劏咗就算。生活質素降低啲，唔約朋友食飯，買少件衫飲少杯酒，希望唔好差到要賣樓呢一步，我信個天唔會俾條黑路我行！
「呢幾年咁灰，我諗起王維基曾經同我哋講，人要離開安全區，喺舒適環境下生存會毫無鬥志。但我心諗，都唔好咁辛苦要捱咁耐，俾我舒服番少少都得啩！」頂住呀！
撰文、攝影、攝錄：娛樂組
場地：華星冰室
服裝： Zalora HK
nextplus.nextmedia.com
|
鍾意就快D Share啦！
|
|
|
