進擊的Mandy Lieu又孖人哋嘅老公周焯華（洗米華）周遊列國，本報收到讀者林太爆相報料，佢話噚日傍晚6點幾，喺首爾The Galleria Department Store嘅food court，見到洗米華同Mandy喺度買嘢食，兩個着住黑色情侶裝，揀完一輪後，佢哋買咗一塊燒排骨分甘同味，兩人唔止共食一份餐，喺大庭廣眾下互相餵大家食嘢，Mandy仲攞住杯嘢飲，遞到洗米華嘴邊，Mandy咁識冧佬，難怪洗米華走唔出佢嘅五指山啦。
林太話洗米華同Mandy大約食咗半粒鐘就離開，全程冇保鑣下享受二人世界，佢哋醫完肚後拖手行商場，邊行邊好sweet講BB話，肉麻到痺，生完囡囡嘅Mandy着短裙仔身形弗爆，咁啱今日係洗米華同Mandy所生嘅囡囡滿三個月，唔知佢哋係咪去首爾旅行慶祝囡囡滿三個月呢！另外，洗米華件Tee係法國牌子Zadig & Voltaire，售價為90元英鎊。
至於洗米嫂陳慧玲（Heidi）似乎收到風老公又走咗去陪小三，今日洗米嫂喺facebook貼咗兩張文字圖片，一幅用英文寫：「Weak people-revenge.Strong people-forgive.Intelligent people-ignore!（弱者－復仇；強者－原諒；智者－無視）」；另一幅係馬克語錄：「比你差的人，才會在你背後補刀，比你優秀的人，根本沒時間理你。」言下之意，智者洗米嫂似乎對老公開始死心，根本懶得再理佢同Mandy了，費事令自己激心！
比Mandy遲咗10日生女嘅洗米嫂，本月30號係佢同洗米華嘅細女周羡潼滿三個月大嘅日子，據知，呢日洗米華兩公婆會喺澳門幫細囡搞百日宴，同時為大女周梓潼舉行生日派對，實行雙喜臨門慶祝。
睇嚟洗米華應該好快結束同Mandy嘅首爾之旅，趕返澳門向老婆交人，為咗要享齊人福，梗係要付出代價，不過，睇洗米嫂今日嘅fb嘅貼圖寓意，唔知佢仲可以忍幾耐呢？
| 讀者林太透過爆相爆片，指Mandy Lieu同洗米華同遊首爾，Mandy仲餵洗米華飲嘢（右圖）。（讀者提供圖片） |  六月時兩人曾被影到喺新加坡買嘢。（資料圖片） |  （讀者提供圖片） |
 洗米嫂Heidi喺facebook貼咗兩張文字圖片。（fb圖片） |  之前周柏豪（中）生日，Heidi抱住B女，同洗米華﹑以及洗米華父親及家姐慶祝。 |
|
鍾意就快D Share啦！
|
|
|
