蔡思貝簽咗 10年死約，力谷是常識，今年已拍三套劇，上週六（ 12日）喺上環為新劇《純熟意外》拍外景，又做女一，心情當然開朗。
真面目
嘥青春 花旦走晒 蔡思貝陳凱琳賣身 10年
小生花旦今年逐一離巢，胡杏兒、徐子珊走咗，𠵱家連一哥陳豪都話想走，真係戥大台擔心。人工唔加、製作縮皮，但又想班人唔走，極高層又諗到屎橋喇，就係簽長約。
據知蔡思貝、陳凱琳等有人氣又後生嘅姐仔，原來上年已分別簽下 10年死約，二人即成為力捧花旦；而三位應屆港姐上星期亦見咗戲劇總監曾勵珍，據知珍姐亦想十優港姐冠軍麥明詩簽呢份長命約。
去到 2025先完約，到時仲係咪一台獨大？
今年大台爆發小生花旦逃亡潮，上星期胡杏兒以 2,400萬轉會簽蕭定一，而不死子珊已靜靜雞完咗約、陳茵媺又完約，一個月冇咗三個花旦，大台都算重傷。花旦荒持續，據知一眾高層都積極同尚餘一年約嘅小生花旦，提早續約以免再爆發逃亡潮。
睇中麥明詩
由於大台以往只係同花旦簽 3年至 5年約，隔幾年就會有人扭計，為免同樣事件再出現，極高層原來上年已開始有新招應對，就係簽 10年長約。今年上位極快嘅兩位 13年港姐冠、亞軍陳凱琳和蔡思貝，劇接劇兼做女一已係事實，當其他花旦仲捱緊騾仔時，兩位出道兩年就做女一，上得快，原來因為兩位上年已簽下 10年死約，而且 5年後仲可加簽，陳凱琳、蔡思貝兩位今年都係 24歲，即係去到 33歲先完約，到時少女都變中女。
大台亦算盡，力谷兩位同時，亦希望佢哋做「人辦」，簽長約就上位快，令其他小生花旦願意同大台簽長約。而上週三位應屆港姐亦見過戲劇總監曾勵珍，據知珍姐對十優港姐麥明詩相當欣賞，亦希望佢簽呢張 10年賣身契，不過麥明詩似乎想從政居多，簽 10年真係太長，應該唔肯。
一年走 5花旦
北上掘金好賺，拍一集收入好過喺大台拍一年，加上大台製作馬虎，對花旦嘅吸引力越嚟越低。今年就有 5位花旦離巢，其中胡杏兒以 2,400萬簽約蕭定一，聽講呢下激親大台，當然大台冇嚟採訪啦，方丈份人係點……你知啦。
採訪、撰文、攝影：娛樂組
|
鍾意就快D Share啦！
|
|
|
