熱爆娛樂: 好碼頭　撇黎明　柏豪帶隊「復出」　衞蘭：𠵱家有屋企嘅感覺 [FACE

2015年9月16日星期三

好碼頭　撇黎明　柏豪帶隊「復出」　衞蘭：𠵱家有屋企嘅感覺 [FACE - 434] 衞蘭,周柏豪,柏豪,黎明,MF,

臨出場前，衞蘭（左）都有啲緊張，不過有妹妹衞詩陪住，當堂定晒。

真面目

好碼頭　撇黎明　柏豪帶隊「復出」　衞蘭：𠵱家有屋企嘅感覺

曾被老闆黎明笑指「肥過部電單車」嘅 Janice衞蘭，心淡離巢後唞足大半年，最終孖住妹妹衞詩簽約華納，總算有個新開始！

新環境新人事，上週三（ 9日），周柏豪領軍一班同門師弟妹到北京開騷，衞蘭衞詩擔任神秘嘉賓，之不過，自知身形仍有待修身嘅衞蘭，如今一星期做足 6日瑜伽，仲刻意節食減肥，務求以最佳狀態示人。簽約新公司，衞蘭笑晒口話：「好熱鬧！𠵱家有屋企嘅感覺！」乜以前跟黎明嗰陣冇咩？

繼美國後，華納再次晒冷移師北京進行「癲峰聲鬥士」，繼續由周柏豪同連詩雅兵分兩隊進行 PK賽，剛剛加盟嘅衞蘭衞詩就首次登場！成功泊到好碼頭，衞蘭都唔敢怠慢，開始節食減肥，綵排當日都只係食咗個麵包作正餐，就算喺後台面對一枱美食，衞蘭都只係望下就算，好大決心喎！

事隔大半年，衞蘭已經轉投新公司，出場時人人拍爛手掌，狀態大勇㗎！

正值減肥時期，衞蘭對住一枱美食都不為所動。

開騷前衞蘭（左）都係食個麵包頂肚就算，意志果然夠堅定呀！

衞蘭新加入，連詩雅寫出「 Janice We love u」以示歡迎。

衞蘭話閒時會做瑜伽 keep fit，夜晚 6點後就唔食嘢。網上圖片

可以集齊公司所有歌手開騷，先去美國再去北京，有得玩、又可以增進歌手之間感情。

「日日都有做運動！」

衞蘭接受《 FACE》訪問，她說：「進入新環境、新同事、新老闆，初頭有少少唔係好適應，因為我比較怕醜！華納同事好好，令到我好有屋企嘅感覺！自己都好期待返去 studio錄新歌！（減肥中？）我唔係食好多零食嘅人！𠵱家日日都有做運動， at least一個鐘，有時做吓瑜伽，盡量 6點前食嘢！」至於柏豪對衞蘭表現亦讚不絕口，柏豪說：「直頭正兩姊妹好唔同風格！一個好柔，好似天使聲、一個好 show到 technique，好有力量！」

一班香港歌手難得到北京開騷，眾人都表現落力，一哥周柏豪用人力車拉住連詩雅揭開序幕，之後每隊各自派出成員進行 PK，結果由網民以手機投票選出，最後由柏豪 A隊勝出；不過 B隊的衞蘭，可能太耐冇見歌迷，唱〈我願意〉和〈記得〉時反應超好，連隊長 Shiga都喺台下舉牌支持呀！