連詩雅喪啪止痛藥 出戰挪威馬拉松
歌手連詩雅近日為出戰挪威大型馬拉松賽事進行體能特訓，首次挑戰半馬的她自爆今次是負腳傷出戰。因懶理醫生警告要求她停跑，每日繼續操練，現時需依賴食止痛及消炎藥減輕痛楚，但她揚言即使最後的結果是會令日後行動不便，甚至冒着跛的風險，亦誓言絕不放棄賽事！
連詩雅（左）與Inez打拳操心肺功能。
連詩雅勤練跑，並接受「狼牙棒」治療。
連詩雅講玩高危活動講得興起，動作甚大。
歌手連詩雅（Shiga）與早前盛傳被硬撬過檔的前鄧麗欣排球隊Loey「球花」之一梁諾妍（Inez），近數月為出戰本周六（19日）在北歐挪威舉行的大型馬拉松賽事的半馬比賽進行地獄式特訓，跑出香港！二人日前到拳館進行訓練，除了打泰拳操心肺功能外，還作瑜伽動作訓練柔軟度，現場有專業人員以「狼牙棒」為Shiga多年來跑姿錯誤而導致的傷患進行劇痛治療，期間她不斷湧現痛苦表情及連番尖叫：「痛呀！」
強忍痛楚受訪的Shiga表示，所有訓練均以完成半馬賽事為目標，坦言以往因腳踭先落地的跑姿不正確，導致膝蓋長年勞損：「平時跑10K多，今次第一次跑半馬，所以真係搵咗個教練嚟Train我哋，佢可以針對我哋唔同嘅需要糾正跑姿。（今次係首次跑出香港？）係，我哋會去到挪威參加北歐一年一度嘅大型馬拉松，自己都好緊張、好開心，但某程度上又好有使命感，希望可以完成賽事，同埋好開心有人同自己一齊跑，有朋友問我：『唔驚變比較咩？』我反而覺得係互相鼓勵。」
目標2.5小時跑完
Inez透露二人已定下目標：「想喺兩個半鐘內跑完半馬，所以比賽前兩個月就開始訓練，要增強體能先接受挑戰。」而Shiga與Inez暫時1K（一公里）的最佳成績分別是5分30秒及4分10秒。
問Shiga傷患情況？她說：「之前睇骨科、物理治療師、照X光，都話膝頭哥腫脹，係關節筋膜炎、肌肉發炎，依家有食消炎藥，同埋要經常敷腳，老實講，依家跑步對我嚟講好吃力，醫生同我講跑之餘更要有充分休息，唔可以太過Overuse膝頭，否則就會影響日後嘅行動，甚至有可能會跛。（醫生有冇叫你唔好跑半馬？）有勸我休息多啲，警告我要我停跑，我唔係唔想聽，但真係好想完成賽事，惟有唔好逼自己日日操，一痛就停，抖一抖先再嚟過。（痛到食止痛藥？）有，其實都真係驚好似醫生咁講會影響之後做運動或者行路，但依家係諗住跑完先算，因為心理上嘅興奮可以掩蓋所有痛，所以一定唔會放棄。」
有時間會打番排球
談到Inez是否因備戰賽事而退出Loey排球隊，她說：「依家每星期最少跑3至4晚，冇咁多時間再同排球隊練多兩晚，如果之後有時間都會打番排球。」Shiga補充：「為呢個賽事有好多其他運動都要放埋一邊，我暫停咗跳舞，如果之後對腳冇事，都會跳番舞。」問她們的男朋友有否心痛其特訓？Shiga笑指老闆最擔心：「佢叫我量力而為，係佢日日打電話畀我，捉我睇醫生。」Inez則說：「所有朋友都支持我哋。」
另外，Shiga前晚偕周柏豪、許志安、韓國組合N-Sonic現身音樂會，她澄清早前在美國玩高空滑翔爆喊，並非扮出來，柏豪則口痕建議一起到澳門玩笨豬跳，Shiga即自爆曾被騙玩，當時亦是嚇到喊，期間，講得興起的Shiga一度走光露底。
體育精神唔錫身
對運動細胞甚為活躍的藝人來說，負傷比賽並非新鮮事，而且落場後表現賣力，體育精神可嘉！
譚詠麟
阿倫對足球充滿熱誠，早前即使腳傷仍頂硬上落場比賽，最後更上演「帽子戲法」，賽後即乖乖覆診睇跌打。
容祖兒
祖兒參加內地真人騷《報告教練》特訓期間不小心拉傷，仍堅持落場比賽，於足球賽事跑足全場，面對男性球員一樣衝前攔截，最後其所屬球隊反勝4比2。
劉心悠
第九年參加十公里馬拉松的劉心悠，早前因開工拗柴，仍忍痛負傷跑足全程。她說：「整親隻腳，腳力弱啲，所以唔會『Chur』自己，希望順利完成就得。」
場地：Fight Hard Fitness
文：名人組
連詩雅（左）與Inez打拳操心肺功能。
連詩雅勤練跑，並接受「狼牙棒」治療。
連詩雅講玩高危活動講得興起，動作甚大。
|
鍾意就快D Share啦！
|
|
|
