掃呢頁CODE去手機

2015年9月16日 星期三

電視台冇嘢睇 咁部電視機做乜好? [FACE - 434] MF,



全知言

電視台冇嘢睇 咁部電視機做乜好?

以前電視機可以話係必需品,但𠵱家大台又冇嘢睇、港視啲劇又播晒、亞視更加係提都無謂!再咁落去屋企部電視機仲有咩用?

今期我哋搵咗電視界代表,包括幾乎乜台都做過嘅梁思浩,做過新聞主播嘅周嘉儀,仲有拍咗廿幾年劇嘅伍詠薇等等,講吓部電視機係咪已經變咗垃圾!

梁思浩:變麻雀枱

你知𠵱家免費電視冇嘢睇啦,嗱,我親身試過電視機另一個用途,我曾經出埠搵唔到麻雀枱,我拆咗部電視機落嚟擺平放,打台灣牌,幾啱 size㗎!

周秀娜:當屏風用

有時臨出門前去完 toilet都會用部電視嚟照鏡,因為睇得清個樣;同埋最近睇到個 design好鍾意,電視機原來可以用嚟做屏風,因為嗰間房同廳係一體嘅,擺部電視機喺中間之後,你會覺得電視機有呢個用途好犀利,遲啲我有新屋嘅話都會咁樣裝修。

伍詠薇:玩 hide and seek

我部電視機好大部,𠵱家用嚟同我隻貓玩 hide and seek囉!捉貓抹眼嗰陣佢就圍住部電視機走嚟走去。同埋梗係睇番我以前個台啦,我講緊「歲月留聲台」呀!睇番自己啲劇嘛!

陳思欣:打機睇相

用嚟打機啦,或者上網買吓嘢,同埋睇吓自己啲新聞、自己啲 MV,會睇吓相,因為𠵱家電視機幾方便;屋企部電視有 40吋,打機鍾意 xbox,射擊、賽車都鍾意玩。

呂晶晶:駁電視盒

有時返到屋企好靜,咪開住部電視機有啲聲,唔會咁驚囉!同埋睇電視學吓廣東話都好;同埋駁 iPad上電視,仲有加個電視盒,我最鍾意追網劇、韓劇,最近追番睇金秀賢套《製作人們》同埋《龍八夷》。

周嘉儀:當大芒用

電視冇乜好節目都唔好嘥咗佢,我諗用嚟 play吓相囉!咁就唔使喺電話或者電腦睇得咁辛苦,個 mon大啲有成 42吋啦,舒服啲囉!

街坊最實際:打 PS4

街坊們就實際啲,冇節目睇咪用嚟打機,將屋企變做遊戲機中心囉!

余小姐

都係打吓機,或者當電腦咁用囉!再係冇咩用,掉咗或者賣咗佢,睇吓有冇其他人要囉!

Paul

你唔睇無綫啫,可以睇第二樣嘢嘛!我都係睇 net TV電視盒嗰啲,同埋打 PS4,每日打幾個鐘囉!

林小姐

冇晒電視睇,打機囉!再唔係送畀人囉,橫掂都冇電視睇。當枱用都得嘅,雖然怪怪哋!

即時報料 facepop

熱線: 9222 0828

電郵:facenews@nextmedia.com

facebook: Face Magazine inbox

line、 we chat id: facemagazine

鍾意就快D Share啦!