真人騷
一代女神 孤身一人 51歲吳家麗：男人係鍾意捨難取易
而優則導， 51歲的吳家麗繼年初的《花街柳巷》，個人執導的第二部電影作品《有客到》亦正式上畫。
吳家麗和魯芬一樣，是包括記者在內，不少七、八十後的集體回憶：魯芬 BB是大山婆代表，吳家麗則是混身女人味的大家姐和風塵女子。打電話給魯芬，會勾起我童年看過《女子監獄》後被山東婆蝦的惡夢，打電話給吳家麗，則是「家麗姐」前、「家麗姐」後，生怕一個禮數不週，會被她不動聲色「溶」鬼咗……
實情呢，吳家麗爽快易話為過好多人，一個 WhatsApp過去，她不用一分鐘就回電話：「打得字嚟，乜都講完」時間地點、穿甚麼、化妝髮型一通電話就全安排妥當。
到了拍照那天，我早到，家麗姐更早到。一個人、一副黑超、一大袋衣服，我說幫忙，她已經一支箭揹起那一大袋走在我前面：「我哋呢啲，大大隻，拎慣㗎喇！」
妝是自己化的，轉景轉 look，換着現在那些女藝人，等候的空檔夠我和攝影師先吃個午飯，吳家麗一條髮帶一分鐘就埋位，隨隨便便坐在沙發上，一身都是嫵媚、一舉手一投足都是味道：「𠵱家啲人咩都等人服侍，我當化妝整頭係我自己才藝嚟㗎！」
不少人都納悶，一代女神，怎麼到現在還是一個人？吳家麗撥撥頭髮，淡淡一笑：「啲男人係鍾意捨難取易，要揀都揀個睇落唔會俾檸檬你食㗎行埋嚟請我飲杯嘢？」邊說，她反了一個白眼：「唔使喇！唔該！我見過大把世面，你用多多錢多多鑽石都買唔到我一句好開心好得意……咁做嚟做乜？」
那個白眼，經典到呢，連攝影師都話「怯咗」，我請家麗姐再反多個白眼給我看看，她照做。但是我請她說說唯一一段和已故督察王永基的十年戀情，她卻婉拒：「你明唔明？分咗手咁多年，死嘅時候又唔係佢邊個，我有咩資格講？我最多係一個過客……」
一肚子經歷、一身都是故事，那一下我有點分不清是影像還是現實？是三十年的電影塑造了吳家麗，還是吳家麗演活了香港電影。
其實我都俾人照顧
由細睇到你大，電影、電視，仲有張國榮 MV！
最尷尬係去卡拉 ok，啲朋友就整蠱我，〈 Monica〉點擊率最高！我一見到……唉……
最好笑係見到你話一生人唯一一次劇組指派助手俾你，你話個助手奀挑鬼命，寧願自己嚟！
係啦，𠵱家啲藝人一個助手一個宣傳，再加一個化妝一個整頭係基本裝備，我哋唔同年代工作模式，以前衫頭妝都係自己搞，化妝整頭我當係自己才藝嚟㗎！我唔係俾唔到人工助手，係慣咗一個人，應付到吖嘛！我喺呢行幾十年，個助手反而第一日出嚟做，樣樣唔識樣樣要教，你話幫到手就話啫？
你好多戲角色都係大家姐，我想問下個先後次序，係你本來性格如此，定呢啲角色做得多，慣咗俾人當大家姐？
我有個習慣，一見到啲細粒過我、新過我嘅人，就忍唔住要照顧佢，後輩乜都唔識，要教㗎。其實我本質都想前輩、大過我嘅人照顧我。
屋企有幾多兄弟姐妹？
一個妹妹，但同我爭成八年，成長階段唔同，我出嚟電視台做嗰陣，佢都仲係小學生。
父母做盛行？
爸爸開山寨廠，啤膠做模，媽媽係家庭主婦，我哋住喺土瓜灣十三街。
十三街？咪龍蛇混雜？
舊時唔係咁，多數木廠、傢俬鋪，全部都係前鋪後居好多山寨廠。我哋廠喺地下，住就閣樓，同《花樣年華》、《阿飛正傳》一樣，個人企唔直！嗰個年代嘅香港係有呢啲嘢㗎。
一入行，角色個個都曳曳哋，其實呢？
我好乖㗎！爸爸係潮洲人好保守好惡，郁啲就攞藤條同晾衫竹打，我細個係個嚴守規矩嘅人，從來唔去夜街。我到𠵱家都唔躝街，鍾意留喺屋企。以前讀書，個個同學都興去露營，我咁大個人，除咗拍戲，自己從來冇試過。
初戀呢？係幾多歲？
我其實都唔識分，總之讀書冇男朋友，大個拍拖連手都唔會拖。所以話做戲同現實真係好大反差，證明我做戲好。舉個例子，奸人堅石堅叔，戲裡面做壞人，現實不知幾咁好！佢做戲出色，我吳家麗做戲都成功㗎！你話做戲做番自己，算係咩咁成功？其實又唔到我揀，嗰陣時片種唔係黑社會就警匪、監獄，女性喺呢啲戲可以有咩角色？咪就係交際花、大家姐囉，一係咪應召女郎囉！我都坐過監啦喺戲裡面。
督察前度，我有咩資格講佢？
你有冇做過賢妻良母？
做過?！講起就經典喇，《天羅地網》做梁家輝老婆，每日湊女送飯俾佢，個妝好淡又唔出聲，反而係佢出邊有女人，今次做壞女人嗰個唔係我！
第三者係邊個？
李美鳳！
當年做壞女人做得多，出街都會俾人鬧？
我諗我演技好啦，做呢類型角色做得多，更加多人搵我做。我第一部有風塵味係《龍虎風雲》，做周潤發女朋友，好聽啲叫夜場返工，唔好聽就係小姐啦。可能呢套戲出嚟回響大，我喺電視跳落電影，新面孔會多人注意。
戲入面你精明又惡，似係一隻手指捽得死李美鳳嗰隻，現實中你呢？
蠢到死！我又耳仔軟。戲裡面我佔有慾好強，名利、錢都睇得好重，現實中我一啲都唔叻玩弄人物關係同金錢。成日俾人爭尾數，最搞鬼係最近收咗張廿幾年前嘅尾期支票，幾千蚊，耐到我都唔記得，真係唔知好笑定好嬲。
點解你唔追呢？你係嗰啲俾人借錢都冇諗住叫人還，唔識追數嘅人？
咁又唔會喎！冇人會借我錢，唔係大富大貴出身，一個女人仔又冇乜錢，再講啦，我拍電影啲錢一啲都唔易賺，做咩要借俾人？唔係睇錢睇得緊，屋企人我又冇所謂。
角色咁強，就話嚇親男人冇人有衝動照顧你啫，現實你又唔係咁，點解咁多年遇唔到另一半？
你睇我頭先都係自己一個人揹個大袋，我咁大隻，你話揹唔揹到。我仲記得我同另一個女演員做完嘢去飲杯酒，啲男演員都走晒去佢度……你諗都諗到啦，你行埋嚟問我：「小姐可唔可以請你飲杯嘢？」我一個白眼反埋去話唔使，邊有人敢行埋嚟？個女演員我唔講得係邊個，總之行埋去唔慌會 say no，好溫柔嗰種啦，你俾個男人揀，唔想食檸檬，會唔會走嚟我度？
你反嗰個白眼，真係嚇走唔少人，反多個睇下！
你話咁樣，啲男人都冇癮，想取易捨難，好正常。我見嘅世面多，你用幾多錢都買唔到我嗰下：「好靚好得意」嘅反應，咁就無謂做囉。
我見你 01至 09年都冇拍戲，去咗邊呢？
其實都有去內地，直至 03年沙士真係停落嚟，唔只我，係喺大陸拍嗰班香港人都返晒嚟。一停就再銜接唔到，大陸開始有一班自己培訓出嚟嘅明星，開始用自己人，香港人走咗，佢都要有出品㗎？老實講人哋大學有電影有導演讀，確實係人材濟濟，趙薇都去埋讀導演啦。
咁當年拍拖十年嘅督察，又係點吸引你？
佢嘅嘢唔好講喇，佢過身時我都係送花咋，分咗手咁多年，過身時又唔係佢邊個，你明唔明？我嘅身份唔適當，我冇資格，仲講嚟做乜？我亦都唔同以前，感情放得好低。有個伴係正常，冇咗伴又唔係一個遺憾。舊陣時唔同，女人冇事業、冇學識，一世依附個男人，所以女人會怕男人。𠵱家，冇人會冇咗邊個唔得。男人？你靠佢照顧？會變㗎！做好自己、把握好自己，好過把握身邊個男人𠵱家資訊咁發達，佢呢一刻同你食緊飯，嗰頭篤住個電話，已經約緊小三、小四添喇！
扮唔好係聰明，所以我好蠢！
愛情又精唔精明？有冇試過俾佬呃？
我蠢，但係身邊人點都聞到浸除。我又係演員，睇嘢好細緻，演員諗嘢太複雜喇！
你當時係詐傻定同佢反枱？
年青時我反枱㗎，逐樣證據攞出嚟喺佢面前逐樣拆穿，𠵱家梗係唔會出聲，但你下次唔好旨意我再信你。
點解唔好拆穿？
我諗人哋冇癮囉。瞞你就係唔想俾你知，你搞到破案一樣、逐樣拆穿，我以後唔使做啦，個男人會對我有忌諱。最聰明應該係扮唔知、扮冇發生過。
七、八年都冇拍過拖？
電影入面有拍拖！都話𠵱家感情對我嚟講再唔係重要一環。
咁咩重要？
自己！我唔再接啲太 heavy嘅工作，我去咗 HKU學畫畫，呢幾年我去做導演。
點解會做導演？
電影太男人世界啦，冇乜女人發聲空間，女演員喺電影世界角色好細，但係好多女仔花錢買戲飛，唔係人人想睇打打殺殺嘅男人戲㗎嘛！呢樣嘢人哋唔做，都要有人做㗎。
《有客到》嘅故事係點嚟？
我拍咗幾十年戲，劇本讀過不下幾百個，演員睇世事係多啲想像空間，我一路拍戲睇戲亦都吸收咗好多人哋啲好嘢，唔使遇過唔使特登寫，演員諗故仔畫面好豐富，我嘅原創故仔會不斷咁嚟。
呢班新演員呢？嗰套又同你哋嗰代同唔同？
好好吖！心悠好上鏡， BabyJohn好好戲，子珊我特登冇俾對白佢，想少啲電視味，最大驚喜係婷婷，你知我同大家一樣睇住佢大，佢父母仲要係我哋嗰代嘅 super star，仲以為佢公主病要人湊，又唔係喎，你冇諗過謝賢同狄波拉個女會同我瞓喺街市豬肉檔地下，我都未叫，佢人已經瞓咗喺度！我仲驚佢未去過街市。
你會唔會太錫住班後輩？乜演員唔係應該瞓晒身咩？
唔可以咁講，時代唔同，𠵱家啲人太受人保護，一坐低一班人服侍，係爭在攞埋杯水餵埋你飲啫！婷婷呢啲係對職業尊重。
呢幾年有冇見過後輩唔尊重職業？唔尊重前輩？
有，唔記得，你舉個例嚟聽下！
我有聽過有新人同前輩同場，自己坐喺度叫助手傳話囉！仲有張栢芝，吊住威吔都會袋住電話聽電話！
有咩？我又未遇過咁誇張……但係我有樣嘢睇唔慣，唔知係唔係我太嚴格，我哋以前做戲等緊埋位都唔想分心、都要集中精神培養情緒。𠵱家啲人一停機心都散晒，攞住個電話起勢㩒，叫佢埋位，佢再㩒多兩下，打埋行字先！仲唔散晒？啲戲仲做得好？你話我怪佢，定怪科技進步？
有客到
家麗姐極好傾，做完訪問再留下跟我們幹掉幾籠點心、又去後巷煲多支煙，才一起坐攝記順風車離開。一下車，就讓我巧遇一隻流浪小貓，我當成是緣份，帶了回家。
《有客到》是鬼片，訪問吳家麗這天剛好是農歷七月十四盂蘭節，而《有客到》其中一個故事，又正好是說徐子珊與流浪貓……
你都唔好話，真係好邪！
撰文：朱小博
攝影：范仲良
形象： Bryan@the Flaming
場地提供：來佬餐廳
|
鍾意就快D Share啦！
|
|
|