Angel曾經係同志組織香港彩虹幹事，今次事件後彩虹聯絡過 Angel，但 Angel話幫唔到忙，亦冇朋友可以傾訴。《蘋果日報》圖片
爆 Like王
全裸抗議唔後悔 變性人 Angel：壓力大到唔敢出街
為咗一部手提電腦，變性人 Angel上週全裸走到街頭舉牌抗議，結果被警方以涉嫌猥褻露體拘捕，本月中要返警署報到；裸體又令她形成陰影，唔敢出街見人，究竟乜嘢原因要令 Angel走上呢條路？
34歲嘅 Angel於 13年由男兒身變女兒身，做過同志組織香港彩虹幹事，可惜變性有代價， Angel慘被家人同朋友離棄、俾老闆炒魷魚，一度要瞓街度日，後來有工作又再失業，目前依然靠綜緩維生。
Angel 7月以僅餘積蓄喺惠普（ hp）花萬多元買手提電腦，目的係學習設計程式為日後生計，想搵份工，點知壞機維修一肚氣才出此裸身下策， Angel接受電話訪問時情緒波動表示「唔後悔」，只不過「唔後悔」背後有無限唏噓！
F：點解維修電腦會令你咁激動？
A：部電腦買咗冇耐就壞 touch pad，同埋長期有嘟聲，隔一個鐘頭或半個鐘頭一次。拎去維修咗 5日返嚟依然係壞，試咗 3日再拎番去，師傅話冇得整，上級同佢講，呢部機已經唔係維修問題，係產品品質問題，叫我打去客戶服務中心，聲稱已有記錄，但客服話只係記錄咗有維修過，但冇寫係品質問題，又叫我拎去維修中心。個師傅點解要欺騙我？呢一刻我決定做呢個行動（裸身示威）。
F：點解全裸？有冇考慮其他方法？
A：當時我好兩難企咗喺度，冇出路去將部電腦變番正常，點解要強逼我去用部壞咗嘅電腦！我有諗過其他方法，我搵咗 hp美國總部，佢哋有線上即時對話，佢哋只係叫我搵番香港 hp公司。我考慮到呢個方法（全裸）唔會傷害到其他人，而又可以有最大機會讓 hp正面回應我；雖然你話其他人會望到，但我相信其他人有選擇權，佢可以選擇唔睇唔望！不過我最估唔到係，原來呢個行動之後 hp冇反省，唔知自己錯喺邊。
F：裸身時有咩感受？
A：途人嘅目光令我覺得……會有難受。其實當時唔係最難受，係事後，即係𠵱家係最難受，我估唔到自己承受唔到嗰種因為做過呢件事之後所帶來嘅壓力，我到𠵱家都唔敢出街，好大壓力，覺得啲人認得，被侮辱感，統統都有；只係噚日硬着頭皮咁落街，買啲餸菜，買咗好多日嘅餸菜雪喺雪櫃；因為我已經唔敢見人，唔敢出街，同埋我對於購買一部新電腦有好大障礙同好大陰影，我上網睇其他電腦嘅時候，內心有好大陰影，好擔心嗰部電腦嘅 service。
F：有冇後悔做呢件事同心理問題點解決？
A：唔可以講後悔，我只能夠講到呢刻都唔知仲有咩辦法，所以冇後悔，除非我知道有其他辦法。我𠵱家聽到嘟一聲嘅嘢個心都會跳一跳，同埋成日形住耳邊有嘟一聲。搵心理醫生呢方面暫時個腦一片空白，社工我係不嬲唔信佢哋，社工會明我諗乜咩？我好討厭佢哋！
F：《 FACE》
A： Angel
|
鍾意就快D Share啦！
|
|
|