仲記唔記得《四個女仔三個BAR》？四個女仔，計知名度曝光率，好似以膠穎嫂陳凱琳最掂，不過，計吸金能力，竟然輸俾陳瀅？條數係咁計，陳凱琳簽咗俾無綫，日日拍劇，有真銀搵都無時間搵。反而陳瀅就醒，不足兩年，已經拍過超過十個廣告，收入超過二百萬，完勝陳凱琳。某程度上，陳瀅可以話係打破咗好多潛規則，例如唔係親生女，又可以喺無綫劇《潮流教主》做女主角。之前全裸出書，又無話破壞形象，廣告商依舊咁LIKE。你唔明白?我都唔明白喎。會唔會係咁呢，所謂的潛規則，其實係啲大公司拎嚟呃啲聽教聽話員工嘅啫，講到尾，如果你有料到，就乜嘢規矩都唔使理啦。見到陳瀅咁好景，莫講過無綫啲一線小生花旦啦，就算新人，都走得就走啦。
