今年八十六歲的呂志和，早年搞石礦場、建築、地產及美國酒店業，至十年前投資澳門賭業進身為一線富豪，上週成立「呂志和獎」，邀得前美國國務卿賴斯出席典禮，認真威威，搞到純官（下左）、水哥（下中）和李家傑（下右）也牙癢癢。 （徐柏然攝）
中環人語
土砲闊佬落注「黑米」
新賭王掟廿億成立「呂志和獎」，搞到班土砲闊佬牙癢癢；最巴閉係呂志和獎搵到國際級人馬擔任獎項理事會成員，最搶眼梗係粒「黑米」——前美國國務卿賴斯 Condoleezza Rice；呢位高人在美國民主及共和兩黨皆吃得開，喺丹佛大學修讀博士時，佢師傅係美國史上第一個女國務卿、民主黨嘅奧爾布賴特個老豆 Josef Korbel；前、後兩個國務卿同出一門。
賴斯現潛伏史丹福大學胡佛學院任教；此學院為美國公共政策智囊； distinguished fellows就係列根年代國務卿舒爾茲（ George Shultz），呢位共和黨元老級人馬，小布殊上台任總統都要得佢老人家首肯，之後仲「醒」咗個愛將賴斯俾小布殊出任首位黑人女國務卿；呢粒咁有政治能量嘅「黑米」，已經吸引到華資地產商落注；唔單只呂志和識貨，連恒基李家傑、郭炳湘同埋新世界純官都四出搵路數，捐吓錢俾賴斯任教嘅史丹福大學，出年美國大選，叫做「落定注」先。
金融逍遙客：頭等艙歎淋浴間
游走於中港台併購、私募投資的金融多棲動物，現為多間上市公司主要股東及董事
畢菲特說過，他從不考慮投資航空公司，可見買航空股風險有多高。美國自 1978年開放航空公司競爭後，業內累積虧損已超過六百億美金，歷年破產的航空公司比航空公司總數還多一間，因為泛美航空前後破產過兩次！看見機場泊滿一架又一架以億元計嘅飛機好大陣仗，但航空公司固定成本高，不只要睇油價食飯，由於大部分飛機都要借盡按揭，利息稍加一啲都唔易頂。今年各大航空公司搵到啖食全靠油價向下，加上利息多年偏低，並非行業出現基本變化。論好睇唔好食行業，航空公司認第二，都冇乜其他行業敢認第一。
環顧全球，亞洲的國泰同新加坡都算異數，年年賺錢之外又長年佔據最受歡迎航空公司頭幾位。逍遙客一年飛行時間應不少於任何一個空姐，作為消費者有唔少體會，總結出來，也是一句放諸任何行業皆準的觀察：成功非僥幸，失敗有原因。歐美航空飛機雖然不乏又新又大的 A380、波音 777，但服務膳食真係不敢恭維，經常在頭等艙啃佢哋又凍又硬嘅麵包，而且，成架飛機想搵個 50歲樓下空姐都難！論飛機，國泰都算慳皮，至今 30幾年機齡人稱「 grandpa」的三架 747，仍然飛緊，一架 A380都冇！反觀新加坡航空架架新機，平均機齡全行最新，肯投資又能有可觀盈利，真係管理有道。做得好嘅航空公司都各有必殺技，例如近年中東的阿聯酋、 Qatar異軍崛起，不惜工本添置新機，阿聯酋頭等艙內更首設淋浴間，算是一大突破。總部休息室亦足足成個候機樓咁大，逍遙客有次在杜拜轉機，在五星級睡眠區做咗個甜夢而幾乎錯過航班。逍遙客有時寧願捱貴幾萬蚊票價，都會選擇國泰，全為咗那份香噴噴的空中煲仔飯。呢方面鬼佬航空公司點都唔會明！
中環寸嘴：$1,600坐勞斯萊斯
工廈大王楊耀松長子，是各大有名食肆之 VIP，喜歡研究城中有錢佬對食之要求，透過美酒佳餚，察看人生百態，讓讀者「嗒」落有味。
呢啲時候仲肯「撢」荷包捐廿億整個「呂志和獎」，我都唔執輸過大海，住佢銀河旗下嘅 Ritz Carlton，沾吓啲旺氣嘛；坐去氹仔嘅金光飛航，吖，美國佬 manage嘅真係好啲，個廁所企理過唐人管理嘅 Turbo Jet好多；一落船去到酒店上 51樓 check-in，聽職員講開咗百幾間房咋，梗係啦，冇客開足二百幾間都幾重皮；唉，我第一時間走去 book ESPA，真係慢一步都俾人 book咗，兩粒鐘包埋 facial、按摩兩千銀；試過啲好嘢，唔係返唔到轉頭，係唔想返轉頭呀！
我一入酒店 lobby就瞄到兩部勞斯萊斯，心有靈犀，就租部車上去掟個靚彎拜吓媽祖廟，聽講好多賭場老細、大佬都拜㗎，識車嘅人都知，唔夠殺氣唔好坐呢部車；嘩，我坐埋架「轆死老鼠」去見媽祖仲唔有氣勢，一粒鐘都係千六蚊啫，搞到酒店個大姐大著埋件旗袍親自送上車；個司機又醒目，識得兜我行大運，我老友話「超時」咗十幾分鐘喎，呢個世界最緊要係「有冇錢吖？」；我醒個司機多多貼士咪路路暢通咯！不過坐「轆死老鼠」都有痛苦之處，坐開突然唔坐，人哋會問你係咪勞衰咗！所以話，坐又死，唔坐又死。
長毛大發現
股壇長毛中秋節大發現，從英國國家檔案館查到 1956年 12月 28日，船王董浩雲偕妻子顧麗真，從修咸頓乘坐 SS United States往紐約，乘客記錄顯示董浩雲生於 1911年 10月 10日；長毛對中國歷史頗有認知，此日既為國民黨爆發武昌起義，後來以雙十為中華民國嘅國慶日；小宗翻查《董浩雲日記》卻記錄他生於 1912年 8月 18日；訃文亦沒透露出生日子，董浩雲當時與國民黨關係密切；做航運生意，懂得「看風使舵」，生日撞正國民黨大日子，唔使擦鞋都受晒；咁董建華生日係咪應該修改至 10月 1日呢？
撰文：宗菁華
centralman@nextmedia.com
|
鍾意就快D Share啦！
|
|
|