商品崩潰觸發全球股市大冧，分析員普遍預期港股會跌至兩萬點樓下，持重貨者真正如「火燒後欄」。（法新社圖片）
封面故事
環球熊市
商品市場崩潰，觸發環球股市再度急瀉。本週一，香港股市假期休市，正當市民在欣賞超級月亮之時，外圍商品市場及股市已哀鴻遍野。全球最大商品交易商嘉能可（ 805， Glencore），市值超過千億元，其倫敦及香港股價，先後暴跌近三成，市值一日間蒸發數百億。本週二，恒指收市創下近兩年低位，貼近二萬點關口。不過，這只是血流成河的前奏，環球股市已確認步入熊市，陰乾式下跌將成為新常態。
本週二，恒指開市即跟隨歐美股市急挫，上午一度跌超過八百點，創兩年來新低。黃大仙的大新銀行雖然仍舊坐滿師奶、阿叔，但氣氛淡靜，眾人都呆望電腦，間中傳來一句：「快啲止蝕」其中水貨客兼老股民王先生，每天九時走完水貨，賺到約六百元，就來看股市。對於恒指大跌，他認為與外圍股市無關：「係上市公司玩財技，好似譽滿國際（ 8212），又二十合一，又供股。仲有立基工程（ 8369），好有智慧嘅人才會買，今日跌咗九成五，證監會應該捉管理層去傾偈」對於會否「撈底」，他直呼：「無邊隻股票安全，最好都唔好炒股啦，唔係就好似我咁要做乞兒（水貨客）啦。」
股市急挫，細價股固然「冇運行」，藍籌股更近乎全線見紅。油股三兄弟，包括中石化（ 386）、中石油（ 857）、中海油（ 883），均挫近百分之七。不過，表現最差藍籌是濠賭股，金沙中國（ 1928）跌超過百分之九，銀娛（ 27）跌穿二十元大關，跌百分之七。
另外，金融板塊亦是重災區，友邦（ 1299）跌超過百分之三；工行（ 1398）跌近百分之三。
環球熊市未見底
又是中國惹的禍。本週一，國家統計局公布，內地八月份工業利潤按年挫 8.8%，為一一年有記錄以來最大跌幅。其中，採礦業利潤按年跌幅達 57.3%。中國經濟增長持續放緩，觸發環球商品價格大跌。恐慌情緒蔓延至環球股市，美國道瓊斯指數週一收市勁跌超過三百點，歐洲三大股市中以法股最傷，跌 2.76%。上證指數收市亦跌百分之二。亞洲最傷是日本，單日跌超過百分之四。
東驥基金董事總經理龐寶林直指，現時中港股市已是「股災級別」。「恒指由二萬八千點跌落來，跌咗近三成，已經係股災。 A股都係，由高位跌咗超過四成。依家最強係美國，今年都累跌咗一成，而佢最強嘅生物科技股，跌得仲甘。」龐寶林指過去八年，全靠各國印銀紙來谷起大市及樓市，環球經濟並未有復甦過，「美國夾硬想加息，都係想俾信心市場。」他表示，現在最重要是看中國政府會不會再「做嘢」，「希望十月再有救市政策出台，否則就大鑊。」
商品一哥恐變「雷曼」
本週一，全球最大商品交易商、全球第四大礦商嘉能可，在倫敦的股價，單日暴跌近三成。週二，香港股市開市，嘉能可股價亦如期急瀉，收市同樣急跌三成。集團五年期債券違約風險指數（ CDS）更颷近三年新高，投資界憂慮嘉能可成為「商品界的雷曼」。
Investec分析員指，如商品價格企在現時價位，嘉能可的 equity value（股東價值），可能等於零。「商品市場升跌其實主要睇中國需求，所以有投資者會大手沽空嘉能可，反映對內地經濟唔睇好。」一名業內人士說。
翻開嘉能可往績，這個商品界一哥，在中國崛起的時期，迅速壯大。公司在礦業界傳奇人物 Ivan Glasenberg帶領下，在商品界叱咤風雲。一一年上市時，創下倫敦歷來最大上市集資紀錄。翌年，嘉能可與瑞士礦商 Xstrata合併，同時包攬商品開採及交易兩大業務。去年野心勃勃的嘉能可，再次向澳洲礦業龍頭力拓招手，雖無功而回，但亦成為國際熱話。風光萬千之際，商品市場卻急速轉壞，嘉能可首當其衝。去年七月至今，嘉能可倫敦股價已累跌約八成。截至今年六月底，公司的負債高達三百億美元。早前，公司再宣布一系列減債措施，包括停止發放一五年終期息及出售資產等，旨在明年底前，削債三分之一。
恒生投資服務首席分析員溫灼培指，中國以外，其他新興市場亦前景未明，將繼續影響商品價格表現：「巴西雷亞爾同泰銖不斷下跌，馬來西亞令吉跌低過九七年，佢哋對商品需求量係最多，都會繼續拖累商品價格。」
專家點睇？
商匯專家 易跌難升
溫灼培續指，聯合國逐步取消對伊朗的制裁，未來有機會解除貿易禁運，雖然最快下年先實行，但將影響油價走勢，「伊朗係石油出口大國，供應多咗，長遠嚟講不利油價。」不過，他指歐美入冬對油價有一定支持，預料今年內紐約期油在四十至五十美元左右徘徊，但難穿五十美元。至於金價，因兩大需求國中國及印度，近期經濟表現疲弱，難以支持金價：「印度啱啱降咗半釐息，金價暫時無上升理據，暫時都係睇每盎司一千一百至一千一百五十美元徘徊。」
除了商品價格下跌，今年環球焦點肯定包括「貨幣戰爭」。百利好金業研究部董事黃耀明表示，由於商品價格下跌，對商品貨幣也會有一定影響：「近期個別貴金屬有炒作，但係普遍嚟講走勢都係差。澳元跌幅可能會比之前少，期間有機會反彈，但都仲係處於跌勢階段，澳洲經濟又未有明顯改善，相信都會喺兌六十八至七十二美仙之間徘徊。」他料紐元跌勢將會持續：「紐元近期相對穩定，但係嚟緊跌勢有機會比較急，預料會跌到去兌五十七至五十八美仙。」
基金經理 最低見萬九點
至於股市，中投傲揚精選基金經理溫鋼城指，中國經濟不穩，難以看好後市：「近期跌市都反映外資擔憂中國經濟方面到底有咩問題，中央救咗年幾市，都睇唔出經濟數據有起色，啱啱出嘅財新九月中國製造業 PMI初值跌到去四十七，無好轉跡象，而新增出口訂單指數去到四十六，簡單啲嚟講工廠連訂單都無，即係唔使買材料同請人，你話經濟前景點會好？」溫續指，上證「跌唔落」，純粹因為中央托市：「停咗 IPO，用唔同方法阻撓沽空，及限制減持，無呢啲政策，好難相信個市仲有三千點。」他料港股短期內冇運行，股民只能等待中央救市炒波幅，「可能下試二萬點，甚至去到一三年嘅低位一萬九千四百二十六點。純粹搏反彈嘅話，要睇上證跌到去三千點左右，等阿爺出手，呢個時候內險股通常會反彈。高息股亦可以考慮，好似越秀房託（ 405），個市跌都叫做有息收。」
而豐盛金融資產管理董事黃國英，亦認同港股仍未見底，「好驚又未至於，未必會跌到萬六，短期睇一萬九千點至一萬九千五百點。」他指今次嘉能可事件與當年雷曼時的情況不同，「依家啲公司嘅財政狀況好好多。」不過，他指恒指短期或出現 risk-off（規避風險）的 sell-off，拖低大市，之後會有反彈，但僅限於部分股票。「唔好再買指數基金，因為金融股及商品股已經釘蓋，佢哋佔指數成分好高。要撈底，就要揀低負債嘅實業股，例如長和系，仲有中國海外（ 688），負債比率係同行最低嘅。」
股市專家 趁低執死雞
七月初時的恒指股災，專炒細價股的渾水，曾指蝕掉一層樓的首期。這次跌市，他指對細價股及殼股等影響較今年其他股災更輕微：「暴跌嗰隻立基好明顯有問題，因為上星期有人 mark咗十四元同九元兩個價，高過當時股價好多，好似話會俾人查。」今次個市係跟住美股外圍跌，所以細價股、殼股呢啲係冇咩問題，因為上次幾次跌市，啲細價股已經跌到好殘，所以係有水位反彈嘅，好似世界集團（ 713）今日都上咗升幅榜。我個倉今日都只係跌咗少少，冇上次輸得咁傷。」
他又舉例指，中國順客隆（ 974）及港華燃氣（ 1083）等亦值博。同時，早前透過要賣殼的股份，甚至是賣殼失敗的股份，都可以留意：「之前賣唔成殼嘅，可能係因為技術性問題，其實係可以趁而家撈底去入貨，因為而家個價跌到咁低，其實會有好多潛在買家去傾價，隨時好快又賣得成，之前隻新源控股（ 1048）賣得唔錯，我覺得百威國際（ 718）、大洋集團（ 1991）同埋遠東控股（ 36）都可以留意。」
揸現金等再跌
宏高證券投資經理梁杰文指，嘉能可事件並非突發性，因為油價、銅價等已跌了很多，「商品市場只是外圍因素，對港股走勢影響最大嘅始終係中國經濟表現。近期中港股市一直有資金流走嘅問題，要留意情況會唔會惡化。」他指恒指下一個支持位應在一萬九千點左右，現在尚未出現恐慌，散戶最好揸現金，等真正大跌市時再撈底。
經濟學家關焯照並不悲觀：「今次唔係股災，只可以話係牛皮偏淡。環球經濟放緩，資產價格都在調整，外圍仲有調整空間，但唔會插水式下跌，如果美國這幾星期的數據不是太差，耶倫十月加息，意味着對經濟有信心，反而利好。香港而家就跌得差唔多，最多跌多一千點， PE已經七倍，值博率好高，金融及地產以外，都有個別股票唔錯，雖然短期未必會升番上去，但長揸係可以嘅。」
撰文：財經組
攝影：財經組
攝錄：財經組
資料：黃詠茵
插圖：朱桂葉
news@nextmedia.com
|
鍾意就快D Share啦！
|
|
|