去年底梁烈唯因為唔想再咁多口，於是將個唯字改做維，但用了兩個月後，發覺運程比之前更差，於是改番做唯，但看來唔關個名事，係關個人事。
探熱針
神憎鬼厭：「負皮王」累街坊 梁烈唯新節目被斬
招積臭寸的梁烈唯，因為在微博放了張敬禮相，被高登巴打給予過萬個負評，破晒紀錄成為「負皮王」。
據了解，無綫原本打算安排梁烈唯與金剛及王貽興三人孭飛做新節目《男人經》，接替李思捷的《今晚睇李》，但大台見「負皮王」犯眾憎，勢必拖累節目收視，圍插程度隨時嚴重過《今晚睇李》，於是將成個節目未開檔先收檔。
錢都唔要
一直落力擦住高層余詠珊的梁烈唯，終於獲得對方「點燈」，安排他孭飛與金剛及王貽興一齊主持集清談趣劇與旅遊於一身的新節目《男人經》，用以接替在噓聲中結束的《今晚睇李》時段。
點知高登巴打睇梁烈唯唔順眼，以破紀錄過萬負評榮登「負皮王」，被封王後，無綫即時大為緊張，更史無前例咁快手，兩日內決定將新節目斬頭，就算金剛早前已經飛到台灣拍外景，寧願錢都唔要，以免節目因為梁烈唯個人而被圍插鬧爆。
損失慘重
「之前思捷個《今晚睇李》已經俾人插到體無完膚，公司見唯唯乞人憎程度竟然仲勁過思捷，新節目出街，肯定俾人插爆，呢隻鑊冇人孭得起， Sandy（余詠珊）都覺得好大風險，所以忍痛將個節目 cut走；而家仲度緊，搞過其他嘢，喺未搞掂之前，就要播住啲特備節目，好似嚟緊呢個星期，會播個 Twins嘅回顧節目。」無綫幕後工作人員說。
被連累的金剛同王貽興，因為新節目 hold了三個月期，外面其他搵錢 job，全部推晒！如今無綫將新節目斬頭，二人來來回回大損失，怨爆梁烈唯，佗衰家！
撰文、攝影、攝錄：娛樂組
nextplus.nextmedia.com
|
鍾意就快D Share啦！
|
|
|