熱爆娛樂: 恨拍戲：飛起恩人　關楚耀投靠曾志偉 [壹週刊

2015年10月1日星期四

恨拍戲：飛起恩人　關楚耀投靠曾志偉 [壹週刊 - 1334] 志偉,關楚耀,曾志偉,M1,

探熱針

恨拍戲：飛起恩人　關楚耀投靠曾志偉

曾志偉名下新公司 All In One雖然未正式打鑼鼓，但公司已開始運作，親自出面招兵買馬的獎門人，先後斟過譚耀文、周麗淇、徐子珊等人，其中已落實簽約的有關楚耀，有指志偉打算力谷對方做影壇接班人，棄歌從影，關楚耀唔使諗，飛起環球。

阿倫攬晒上身

曾志偉自組的新公司 All In One簽藝人之外，還會搞電影製作，公司成立後志偉便周圍揀蟀，雖然獎門人親自出面傾人，但至今答應加盟的藝人冇幾個。「志偉傾過譚耀文、周麗淇同徐子珊，不過全部都未落實，連佢自己個仔曾國祥都唔簽！唯一 confirm咗嘅，只有關楚耀，公司而家已經有人幫佢傾 job。」知情者說。

據了解，關楚耀老豆關維麟同志偉相識多年，加上老死譚詠麟是對方契爺，志偉更加俾力睇住世侄。

「阿倫當關楚耀自己仔咁錫，知佢想喺電影方面發展，出晒面幫佢搭路，阿倫出晒聲，志偉就算再冇尾飛鉈，都會特別照顧由細睇到大嘅關楚耀。仲有，校長明知契仔唔簽環球會俾人話反骨，所以周圍同人講，關楚耀跟志偉係佢嘅主意。」

據知，譚詠麟入行四十周年派對上，阿倫多次叫志偉睇住契仔關楚耀，因而促成了他們的合作。

阿倫與契仔關楚耀感情要好，由他出道至今，一直幫他鋪橋搭路。

近年 Kelvin在影壇發展不錯，尤其在《愛•尋迷》及《末日派對》中的表現，更得到不少讚賞。

吃力不討好

○六年，關楚耀憑老豆曾經做過寶麗金（環球前身）高層，加埋契爺譚詠麟拉線，簽約環球唱片入行，○九年發生在日本藏毒事件，前度衞詩被黎明即棄，關楚耀不但未有被公司放入雪櫃，反而千方百計，幫他洗底，不離不棄。

「 Duncan（環球高層）好錫關楚耀，藏毒衰咗都冇放棄佢，仲用盡方法扶佢起身，就算市道咁差，都照幫佢出碟開演唱會，估唔到佢話走就走。」知情者說。

據了解，關楚耀一直想在電影方面有更大發展，過去公司雖然亦努力 sell他，但相比曾志偉在影圈人脈關係，環球始終吃力不討好；秤過度過，關楚耀決定走人。