娛樂偵訊
唔想變凍肉 孱仔洪卓立操做肌男
洪卓立○九年爆肺要休息一年，之後因為食極唔肥，試過為增磅食增肥藥，點知多出的肉全部集中上面，變成包包面。英皇於是下旨要洪卓立操好個 body，如果繼續肥腫難分，會直入雪櫃；唔想變凍肉，洪卓立只好狂操，望自己由孱仔變肌男。
爆肺窒住
入行兩年後，洪卓立○九年因爆肺引致肺積水，被迫停工一年，事業亦因此停滯不前。
「 Ken（洪卓立）係○七年唯一一個男新人，可以拎晒四個頒獎禮嘅新人獎，多 hit歌又多 fans，同期男歌手周柏豪、陳柏宇同小肥都唔夠佢撼。出道頭兩年有啲威勢，點知後來突然爆肺，搞到肺積水，當時佢個肺穿咗三個窿，其中一個硬係埋得唔好，結果休息一年！復出後情況唔同晒，周柏豪上緊位，跟住又有許廷鏗、鄭俊弘， Ken嘅身體狀況同形勢都唔夠砌。」知情者說。
復修火柴
復出後，洪卓立工作量不多，歌曲亦不似從前受歡迎，想復修火柴身形，可惜又食極唔肥。
「食幾多 Ken都唔吸收，睇落仲孱過啲女仔，佢唔想俾人笑，學人食增肥藥，點知個身肥唔到，淨係搞到塊面脹晒，搞到唔知肥定腫，公司高層見到佢咁，即刻要 Ken減走包包面同操番大隻啲，如果操唔到，就會擺埋佢一二邊。」
開始長肉
唔想入雪櫃變凍肉，洪卓立惟有自救，狂操了幾星期，開始見成績。
「 Ken見好多人都搵阿 King（趙勁皓）幫手，所以走咗去佢度做 gym，阿 King仲專登安排好有經驗嘅教練 Donovan跟佢，操咗幾個星期， Ken塊包包面尖番，個身亦開始見到肌肉，成效唔錯。」知情者說。
肥唔起
娛樂圈人浮於事，競爭激烈，只要稍有差池，包括最基本的肥瘦問題，都會令藝人錯失再上一層的機會。為了錢途，男好女好，減磅是首要任務。
衞蘭
06年出道頭威頭勢， 09年開始因壓力暴肥，由於一直無法控制體重被網民改花名「胃腩」。老闆黎明更公開笑衞蘭「肥過部電單車」。 14年，黎明以開演唱會激勵她做減肥真人騷，將瘦身過程上載官網接受大眾監察，令衞蘭成功減走十五磅。今年轉投華納唱片，事業重新出發，逼住減肥瘦了半個碼。
撰文、攝影、攝錄：娛樂組
nextplus.nextmedia.com
|
鍾意就快D Share啦！
|
|
|