上一個年代，就話父母生十兄弟姊妹一啲都唔出奇，不過，喺0依家年代，陳浩民同你講5年抱4都嫌唔夠，真係嚇到心都離一離。
講開又講，若果兩公婆好鍾意小朋友，3年抱2都嫌未滿足，要做到5年抱4，又可唔可以剖腹生B，因為坊間傳孕婦最多只可以剖腹生B三次，仲建議剖腹後需要休養兩年先再懷孕，究竟呢個講法又啱唔啱呢!？(新聞連結：http://bit.ly/1LDzG40)
有「生仔聖手」之稱嘅本港生殖醫學專科權威何永超醫生，今日接受《蘋果》電話訪問：「以我個人角度去睇，只要係自己一手一腳去做（剖腹手術），盡力在手術中將每個層次還原，當第二次（剖腹）手術時，就會發現傷口似新一樣，只要手術小心，到第三次時亦都會似第一次生一樣，所以係唔會被通常見解限制只可以生三胎。」難怪徐子淇開刀生B可以所謂「突破極限」生四個——只要手術做得好，體質又承受到。
何醫生幫過唔少名人明星接生，佢話只要每次手術做得好，剖腹生B其實係冇任何限制，至於，剖腹後相隔幾耐先可以懷孕？何醫生稱剖腹嘅傷口一般喺兩個月後就康復，佢表示：「產後兩個月已康復，再懷孕時，初期胚胎好細，而懷孕後子宮會充血，反而令血液流通得好啲，有助子宮傷口復原，當胎兒脹至傷口位置，應該要八至十個星期，當時已經距離對上一次手術有四至五個月時間，傷口復元會更成熟。」
以何醫生多年行醫經驗嚟睇，佢就話曾經有個34歲女士大約兩年零三個月內，先後三次剖腹生咗3個嬰兒，喺最短時間生咗最多B!
溫馨提示:每個人體質同經濟能力都唔同，有啲女性可能需要多啲時間去休息，所以想再生B之前，都係要聽醫生專業建議再決定啦。
有「生仔聖手」之稱嘅何永超醫生。（資料圖片） 
陳浩民老婆Lisa上年12月生咗細女，目前又懷孕3個月。（資料圖片）