近年勤力做運動的張可頤，對自己充滿信心，夠膽素顏出鏡，又唔會用美圖秀秀執相。
娛樂偵訊
無 P圖泳衣照流出 46歲張可頤索過選港姐
正展開了悠長假期的張可頤，一個月的歐洲之旅走遍英國、冰島、克羅地亞等地，睇北極光，浸冰火溫泉，享受人生。
雖然已經 46歲，但夠勇氣又自信！張可頤分享了大量素顏照放上社交網站，圖片均未經美圖秀秀，本刊更得到一批絕密泳衣照，身形與十八年前參選港姐時有過之而無不及，尤其是一雙長腿，反而比以前更幼更索。大把本錢，難怪張可頤夠膽唔上色見人。
放假一個月
要返大陸拍劇，又要兼顧在元朗開設的興趣學習中心，張可頤忙完手頭上工作後，決定放自己一個月假，休息回氣。
由於張可頤十九歲開始到英國留學寄宿，之後在曼徹斯特大學（ University of Manchester）讀大學，所以她選擇由英國開始旅程，十月初起行，先飛到當地探朋友。
之後一站是冰島，主要目的是為了睇北極光。出發前，張可頤更買定新相機，希望可以捕捉到大自然奇妙一刻，結果好好彩，連續兩晚都睇到北極光，還一晚靚過一晚，她開心到瞓低地下，睇足成晚。
冰火溫泉
除了北極光，張可頤更專登到 Blue Lagoon藍潟湖溫泉，在室外溫度攝氏三度跳入有三十八度溫泉池水中，體驗冰火感覺。
著住泳衣落水的張可頤，全程素顏上鏡，雖然已經四十六歲，但皮膚白滑剔透，身形更沒有出現走樣情況，保養得相當好，比起十八年前參選港姐時的泳衣舊照，現下的她反而更勝從前，絕對純天然美魔女，唔使攞去驗！
撰文、攝影、攝錄：娛樂組
|
鍾意就快D Share啦！
|
|
|