秋生計啱數視帝畀祥仔
無綫將踏入48周年台慶，昨晚出動逾百藝員出席亮燈儀式，載歌載舞場面熱鬧。兩大型男黃秋生及黎耀祥談視帝大熱之選時不忘互笠高帽，至於歐陽震華則揚言平常心面對「爭獎」，笑言最緊要盡騷演技「吸客」。
無綫昨晚雲集全台花旦小生，為台慶月的《迎挑戰 齊向前 TVB48年》錄影。節目尾聲影大合照則根據劇集決定演員「排位」，熱播中的《無雙譜》藝員黃宗澤、田蕊妮等，以及《張保仔》的陳展鵬、陳凱琳等獲安排「佔中」，反而黎耀祥及歐陽震華等一線則「靠邊站」，黃秋生更未等到大合照環節已自動消失！錄影結束前黎耀祥、陳展鵬及黃浩然等唱歌娛賓，惟初次效果一般最終要重錄一次。
新人難有個人特質
秋生與祥仔主演台慶劇《梟雄》贏得關注，兩人更被視為視帝大熱。秋生昨晚獲安排「領軍」上台宣傳：「拍呢套劇有啲遺憾，如果加埋阿姐（汪明荃）就完美嘞！」氹到汪明荃開心不已。事前秋生受訪時直言對獎項抱平常心：「冇嘞啩！佢哋叫咗我嚟頒獎喎，唔通自己頒番畀自己咩？（頒視帝？）咁又未知，但要頒都頒畀黎耀祥啦，咁先啱數，佢可以幫TVB拍劇，我又唔係成日拍，做生意條數係咁計嘅，況且佢戲好。（視后呢？）事後先講啦。（唔係好識啲新人？）都係，頭先綵排阿姐都叫唔出佢哋啲名。」
秋生又說時下新人難有個人特質：「新人係好多，但跑唔出囉，個個都似人哋，複製咁。（陳凱琳呢？）幾靚女吖，佢算係有性格嘞，另一個就係蔡思貝。（好多人彈陳凱琳喺《張保仔》嘅演技。）佢好靚女，但有個俏媚嘅小動作，做得多好滋擾。（同佢講聲？）唔會，聽日你哋寫出嚟又話我鬧人。我係善意嘅，佢揸槍個樣好猙獰，以前個個偶像任何時間都可以chok。」
獲「加持」信心大增
被秋生大讚為「視帝之選」，祥仔笑說：「佢客氣啫，秋生戲路縱橫，佢頒畀我又唔拘，高手頒喎。其實呢套戲拍得好開心，好易投入同營造氣氛。（秋生『加持』信心大咗？）影帝加持喎，佢同另一拍檔湯鎮業都係我前輩，好大嘅鼓勵，承佢貴言啦。（想第四次攞視帝？）本來冇乜所謂，依家覺得好吸引。」談到秋生指新人乏個人特質，祥仔承認新人多在溫室長大，不像他們以前般刻苦，但新人需要時間浸淫。至於秋生批評陳凱琳多小動作，祥仔說：「新人嚟講佢算聰明同用功嘞，佢都係出咗道一年啫，畀多啲時間佢啦。」
Bobby：邊個都冇所謂
至於另一視帝人選《東坡家事》的歐陽震華（Bobby）則抱平常心：「真係冇乜所謂，我覺得最緊要係拍好套劇，吸引多啲觀眾睇，總之『人在做，觀眾在看』，公道自在人心呀。（睇好祥仔？）唔會，咁嘉穎、陳豪個個都識咗好耐，邊個攞都冇所謂啦，遊戲啫。」
文：影視組
|
鍾意就快D Share啦！
|
|
|