2015年10月18日星期日

千嬅否認為搵學校同老公嗌交千嬅,楊千嬅,

【養兒一百歲】千嬅否認為搵學校同老公嗌交

2015-10-18 17:15:00

(攝影:陳順禎)

楊千嬅同林海峰（Jan）演出嘅新戲《哪一天我們會飛》將於下月5日上映，今日導演黄修平率男女主角及三位新人游學修、蘇麗珊同吳肇軒到尖沙嘴The One出席電影啟航禮，三位新人着校服唱主題曲，千嬅同Jan峰跟粉絲玩遊戲，游學修嘅電影扮演Jan嘅年青版，兩人合照時，由於游學修高過Jan半個頭，Jan要屹高雙腳，游學修就擘大腳相就，十分搞笑。

今日千嬅個樣好攰，佢話：「係呀，今朝好早要湊仔上堂打波，唔好成日跟住媽咪姐手姐腳。」問拍呢部戲有冇諗番中學回憶？千嬅話：「以前讀書好多課外活動，自己讀女校，如果嗰時好多人追會改寫自己命運，我唔會考護士唔會有今日，細個好醜樣頭髮鬈又箍牙又戴粗框粉紅色眼鏡，總之人生最核突三類嘢放晒自己身上，如Jan見到一定追住我放youtube，所以當時好難有姻緣。」Jan聞言抵死話：「畀我見到以為撞鬼。」

對於蘇麗珊喺電影扮自己嘅後生版，千嬅話：「佢靚女同身材好。」蘇麗珊憑呢部戲獲提名台灣金馬獎最佳新演員，千嬅恭喜對方：「好開始，希望現實版都可以攞獎。」

此外，有周刊話千嬅同老公丁子高為幫囝囝搵學校嗌交，千嬅否認：「唔會，最精采嗰啲喺真人騷（《極速前進》）鬧晒，我哋唔會為搵學校而鬧，而且周刊提嘅學校我哋冇報過，我想澄清番呢件事，唔想得失報咗嘅學校，囝囝o依家K2，仲有一年先搵學校，我理念係信條命，所以乜都報晒，攬珠又佢搞，自己亦會報晒。」有兩個女嘅Jan邊聽邊笑：「我聽到好似回到初衷，我理解嘅，我相信周刊講佢哋兩公婆有鬧交，其實太太係會緊張，可能先生提出唔太好提議。」問到佢當年點幫囡囡報學校？Jan話：「當初我乜都報晒。」千嬅：「盡做，正常父母都係咁諗。」Jan仲話：「不過我會推薦周刊講其中一間學校，因為我係舊生。」千嬅聽到即話：「我老公都係喎。」

另《我的少女時代》喺香港首日開畫票房95萬，而當年千嬅嘅《五個小孩的校長》開畫60萬，千嬅話：「我覺得好好，大家都好青蔥，大家可以抱住呢個情懷睇呢部戲，老公睇咗《我的少女時代》覺得好有情懷，相信大家睇《哪一天我們會飛》會有感動，更加有共鳴。」至於有傳nowTV開台劇《瑪嘉烈與大衛》搵Jan聲演邵仲衡的心聲，Jan否認：「乜都未聽過喎。」