前財政司司長梁錦松今朝帶埋老婆伏明霞同三個仔女，一家大細現身科學園，參加「小母牛競步善行2015」，同場仲有世界女子桌球冠軍吳安儀、王梓軒同唐寧。
梁錦松一家參加1km親子接力賽，雖然時間係朝早9點，12歲大女司渝、10歲次子皓嘉同7歲細仔家瑋表現精神抖擻，對於接力賽事準備充足，但係國寶級前跳水皇后伏明霞，似乎婚後只顧住照顧屋企，懶理身形走樣，豐滿嘅身型同當年相比差得都幾遠……比賽開始！一起跑伏明霞就包尾姿態，仲表現得略為辛苦，佢一邊笑一邊跑，老公梁錦松就一直陪伴愛妻，喺身邊鼓勵佢，最後一家跑畢全程，真係溫馨過人。
伏明霞直言冇做運動好耐，提到佢跟唔上其他選手？佢就笑笑口話：「我不嬲最驚跑步，以前都要操體能，都係最驚跑步。」嫁咗人相夫教子，伏明霞已經冇再跳水，游水都比較少，係咪以前練得多，o依家怕怕？佢話：「又唔係怕咗，香港冇呢個環境。」原來3個仔女都遺傳咗媽媽嘅運動細胞，伏明霞話小朋友都鍾意溜冰、滑雪同游水，二仔鍾意跑步，O依家仲係學校嘅田徑隊，但佢哋有冇諗住做跳水運動員？伏明霞就話：「我諗佢哋冇諗，要問返佢哋。運動想佢哋當興趣，唔係要比賽，唔一定要好專業。想佢哋咩都嚐試，我只係識跳水，其他都唔識。」
講到教小朋友，伏明霞話都有壓力，怕佢哋冇交功課，因為老公做嘢好忙，小朋友都要補習，咁伏明霞有咩湊仔心得？佢話：「唔好對佢哋太高要求，要照佢哋性格培養，如果唔係好強，唔好push。」但佢就囡囡踏入反叛期，性格上有變化，所以O依家對囡囡嘅言詞都要在意啲。
再問到有冇同師妹郭晶晶交流下湊仔心得？伏明霞就話佢囝囝O依家先2歲，都係輕鬆階段，問伏明霞仲生唔生？佢就耍手兼擰頭話：「好早之前已經收工」
| (攝影:羅慧敏) |  梁錦松一家五口 |  伏明霞好耐冇做運動...都顯不喺佢身型上.... |
 |  一起跑就包尾.... |  伏明霞坦言最驚跑步 |
|
鍾意就快D Share啦！
|
|
|