人稱Apple姐嘅78歲無綫資深演員夏萍，噚日上晝喺淘大花園屋企唔小心跌倒，據知Apple姐教唱歌嘅老公張雲91年過咗身之後，得番一個人生活，佢同前夫生嘅一仔一女好少聯絡，加上平日只係請鐘點工人打掃，所以喺屋企跌倒都冇人知。
Apple姐喺屋企跌倒之後唔郁得，直至噚晚8點左右，無綫藝員部打電話想話諗住問候吓佢，Apple姐先話自己跌倒，個同事於是即刻打電話call白車，將Apple姐送院救治。據知Apple姐照咗X光之後冇骨折，但身體多處有瘀傷，目前仍然要留院觀察。
今日有人喺醫院見到Apple姐，見佢精神都OK，但就心情似乎麻麻，姑娘幫佢量血壓，佢有啲唔耐煩話：「又量？」跟住Apple姐就不停打電話，話好似想落雨，自己唔記得閂窗，叫人幫佢閂番屋企啲窗咁樣。
林家棟係Apple姐嘅契仔，兩個人相識20年，關係親如母子。家棟今日接受《蘋果》訪問時，話今日無綫一位化妝師打俾佢，先知契媽入咗醫院。佢話：「我都係今日先知佢入咗院，其實我一直好擔心佢一個人住，之前原本安排咗佢入老人院，有專人睇住佢，我會放心啲，原本佢答應入，但後來又改變主意，話想再演多一年戲，咁佢想做戲，我都冇得迫佢，但佢一個人住，再有乜閃失就麻煩，我諗住等佢出院，幫佢請個工人，可以日日貼身照顧佢，咁我就放心好多。」
Apple姐已故老公張雲在生時係教唱歌，梁健平係徒弟，張雲過身之後，梁健平一路都有份睇住師母。今日打畀梁健平，問佢知唔知Apple跌親入院，佢話:「我噚晚收工時大慨8點接到個電話，話Apple姐喺屋企跌親，跌親時間都好長，由朝早挨到夜晚，有人打電話比佢，佢先至話跌親，坐咗喺屋企郁唔到，我知道就即刻撲過去，佢TVB同事call白車，基本上白車同我同步到現場，一齊上樓接佢去醫院。」
咁究竟Apple姐而家情況點？梁健平話:「初步照X光冇骨折，尾龍骨有瘀有腫，其他暫時唔係有乜大礙，我中午都探過佢，佢還可以食飯，精神狀況還可以。佢下午再照膝頭哥，因為佢行動唔方便，可能做個詳細檢查先知大慨情況。」
咁究竟係乜嘢原因跌親？梁健平話:「唔知架，老人家可能失平衡或者失暈跣一跣，好彩唔係個頭着地，係pat pat着地，所以『蹬』親尾龍骨。老人家跌一跌可大可少，所以我叫個同事即刻call白車，可能佢自己有啲驚同擔心，call咗白車去醫院做個檢查，我哋都安心啲。」
梁健平話師母一個老人家獨居比較擔心，佢自己爸爸就係今年5月跌親，之後過咗身，所以老人家跌倒真係唔可以掉以輕心，尤其是屋企有老人家係一個人住嘅話，真係要睇緊啲至得！
|
鍾意就快D Share啦！
|
|
|