對好多觀眾嚟講，無綫節目《都市閒情》嘅「大王」安德尊同李錦聯先至係男主角，好多平時認為《都市閒情》係師奶先睇嘅網民都會坐定定剝花生等睇戲。
噚日嗰集，唔知係咪無綫費事俾呢兩位男主角搶晒啲戲，今次就搵咗宋芝齡拍著李錦聯教煮「海參花膠冬瑤菠菜」。拍著靚女宋芝齡一齊煮餸，李錦聯心情應該好靚。點知佢講下講下講到花膠同瑤柱真係最佳拍檔嘅時候，宋芝齡唔知有心定無意，就爆咗一句「就好似你同大王咁襯！」。李錦聯聽到即刻好似中槍咁，豎起手指話：「唔好同我再提呢個人！」之後繼續扮無事煮嘢食。
示範完之後，安德尊走入嚟第一句就話「師傅你知唔知我喺出面係咁眼眉調，因為你成日提我，搞到我好想入嚟煮！」之後又話「師傅我想問下你有冇見過或者生過牛皮癬呀？」李錦聯見有位入就即刻話「你掉轉頭睇下咪有囉！」。安德尊唯有扮聽唔到，繼續介紹預告內容。
有網民就質疑佢哋兩位男主角啲反應係跟稿讀，亦有網民好想解開佢哋兩位不和之謎。
|
鍾意就快D Share啦！
|
|
|
