陳慧琳Deep到盡預告狂舞飛Bra
樂壇天后即使升呢「潮媽」，依然魅力不減，楊千嬅固然事業家庭兩得意，謝安琪更成為「港男最想接吻對象」選舉的冠軍，至於43歲的陳慧琳亦不遑多讓，她為九場紅館演唱會挑戰極限，戒糖戒油狂操回復未嫁時的23吋蛇腰，更衝破心理關口預告Deep V舞衣低胸到落肚腩，現最頭痛是如何避免「飛Bra走奶」失禮人，更提議在「缽仔糕」上留名，方便台上的失Bra待領。
Kelly昨日身穿運動裝以「S形」身形，現身排舞室為12月18日起，假紅館舉行一連九場《陳慧琳 let's celebrate！世界巡迴演唱會》綵排，和一眾舞蹈員邊唱邊跳，不停扭腰踢腿依然面不改容。雖然屬兩子之母，但仍Fit爆的她直言身材已回復到生小朋友前的23吋小蠻腰，預告將會在演唱會中來個破天荒性感大突破：「已經試咗衫，到時有件衫會開胸開到落肚臍，係我入行以來最性感嘅一次。」除「中門大開」，另一套則是「起雙飛」：「仲有一件跳舞嘅時候着，會開兩邊。」
唔需要谷胸
Kelly在排舞時受訪被問到既然「中門大開」，到時會否谷胸上陣？她即耍手擰頭：「唔會谷，谷咗就唔好睇，唔有型！我寧願唔谷都要fashion啲、有型啲。」擁有完美身形的代價，是每日都要努力排練，Kelly說：「依家每日都要練最少三個鐘，排舞運動量好大，返到屋企周身痠痛，有時返到屋企唔痛就覺得自己好似無盡力，於是就自己繼續練，不過喺屋企一練囝囝就走埋嚟抱住我隻腳，搞到跳唔到。」問到排舞是否較湊仔更辛苦？她笑說：「兩樣嘢，排舞係體力勞動同要記嘢，湊仔就主要係耐性。」
問到老公Alex在家可有幫她按摩消除疲勞？Kelly笑說：「佢都有嘅，幫我搓過兩下，但佢好大力然後又話攰，我自己沖熱水涼好過，囝囝都有幫我整幾下。」同時又表示一對寶貝仔和老公都會來欣賞演出。
跳到成身痛
未見Kelly的Deep V到落肚腩的噴血造型前，日前Kelly在排舞室先來個大露背性感預演，「4張幾嘢」的Kelly束起辮子，依然青春美麗，身形同年紀全屬反比，勝過不少10幾歲(0靚)妹。其實Kelly能練成「逆齡身材」的確付出不少，除戒油戒糖外，每日極大的運動及地獄式練舞曾令Kelly感吃不消，她說：「啱啱跟Sunny Wong排舞時，因為我唔係成日跳舞同做運動，佢幫我拉筋，有次佢將我個身成個對摺，搞到我成身都痠痛，有幾日我返到屋企，覺得自己好似癱咗咁。」
Kelly為慶祝入行20周年更下決心豁出去，尤其服裝方面更大突破：「批衫大約要成5百萬港元，6、7套都係性感，當初美術指導奚仲文畀衫我試，我睇到都嘩嘩嘩，話太性感，但試咗啲人話好靚、好型，我就覺得無所謂。」因Kelly有半場演唱會都是着性感舞衣在台上狂歌熱舞，故她最擔心是走光問題，她謂：「我依然成個腦都係諗緊點防走光，千祈唔好喺台上『飛Bra走奶』咁肉酸，同我一齊跳嘅女dancers都好性感嘅，所以我講笑咁同佢哋講要喺個Bra寫番個名，如果到時飛幾舊嘢出嚟，自己都可以認領番嘛。」
文：音樂組
|
鍾意就快D Share啦！
|
|
|
