熱爆娛樂: 背後女人　男友區選落敗　十優麥明詩蒙面上樓陪通宵 [FACE

2015年11月25日星期三

背後女人　男友區選落敗　十優麥明詩蒙面上樓陪通宵 [FACE - 444] 麥明詩,MF,

林作喺票站等點選結果，女友麥明詩戴住口罩平民 look現身，仲話無論輸贏都唔緊要。

真面目

背後女人　男友區選落敗　十優麥明詩蒙面上樓陪通宵

區議會選舉塵埃落定，其中今屆十優港姐麥明詩男友林作出首次參選，出戰黃大仙龍星選區，點票當晚（ 22日）麥明詩（ Louisa）漏夜趕到票站撐男友，但最終林作以 334票之差輸咗俾譚香文。

Louisa雖然把口就話男友贏輸都冇所謂，但仍難掩失落之情，知道結果之後陪男友返星河明居住所通宵安慰。麥明詩贏盡全世界，男友頭仗失利梗係要安撫下。

十優港姐冠軍麥明詩男友林作係 25歲大律師，本來家住山頂，但為咗爭取黃大仙龍星區議席，去年以 622萬買入星河明居單位，雖然以獨立候選人身份參選，但被指係隱形建制派，出戰係為咗阻止泛民嘅譚香文連任。

麥明詩到場撐男友，卻一直企埋一邊未有同男友講過一句話，而林作另一好友四太仔猶亨（右）亦有同場支持。

才子陶傑陪同林作報名參選又曾開造勢大會，稱 2人理念一致，但投票當日陶傑卻冇出現票站支持。　《蘋果日報》圖片

等點票

等咗幾個鐘，約凌晨 2點就有結果，林作以 334票之差輸咗俾譚香文。

低調入票站

點票當日凌晨約 1點，麥明詩戴住眼鏡及口罩，灰色 tee街坊 look現身，怕怕醜醜咁行入票站會男友，由於當時另一票站點票結果顯示林作暫時落後， Louisa入票站前表示已打定輸數，但無論輸贏都咁支持男友。

不過 Louisa見到男友時卻非常避忌，唔敢行近男友身邊一直保持距離，又顯出一臉倦意表示要坐低，期間冇同男友講過一句話。林作對女友現身撐場則扮作冷淡，回應時不斷重複：「監緊票㗎，我仲喺度監緊票㗎！」至於 Louisa則保持笑容：「我哋一班朋友都會一齊安慰佢，我覺得贏定輸真係冇乜所謂，最緊要佢呢個過程接觸到多啲社會。我唔想影響佢嘅選情，無論好定壞，我知道佢用咗好多努力，佢係靠自己實力。」

可惜未到凌晨 2點，點票結果已證實林作落敗，林作同助選團離開前喺票站外影合照， Louisa卻閃埋一邊唔肯影，喺大家要求下 Louisa至勉強走到人群最後面，但仍然係戴實口罩避開鏡頭，低調支持避免搶男友風頭。

影完合照林作表示肚餓，但太夜冇地方醫肚，一干人等慢慢向星河明居方向走去，麥明詩從後緊隨大隊；去到星河明居齊齊上樓到林作住所休息，身為女友嘅麥明詩亦當然陪住男友，一班人到接近天光都未曾落樓。講贏運，林作拍馬唔及女友喎！