曾經絕交嘅好友何韻詩又肯 add自己，對於呢件事容祖兒不回應，不過同師兄感情穩定，好友又 comeback，唔使講都知開心啦。
真面目
friend番 為劉浩龍決裂 5年 何韻詩 ig半夜 add番祖兒
自從劉浩龍同容祖兒公開戀情後，何韻詩就對兩位劃清界線，指定動作首先要喺各大社交平台取消關注。雖然呢個動作好小學雞，但象徵意義係對你如同陌路，以後有乜事都唔好搵我！
好在時間可以沖淡一切，上星期四（ 19日）何詩突然喺深夜鬼鬼祟祟 follow咗 8個 ig帳戶，而其中一個就係容祖兒。憑呢個舉動，以小學生嘅邏輯嚟講叫做 friend番，同番你玩㗎喇！
劉浩龍，何韻詩、容祖兒曾經 friend到三人行，但自從 12年劉浩龍暗溝容祖兒成功後，三人關係正式決裂，阿詩嘅社交平台亦取消關注二人。呢幾年劉浩龍同容祖兒戀情愈嚟愈公開，而阿詩亦同台灣女演員鄧九雲關係浮晒面。各有所愛，令呢段原本冰封了的友誼開始破冰喇。
祖兒食檸檬
其實今年 1月容祖兒曾經主動想同阿詩 friend番， instagram主動 follow番何韻詩，不過曾經「用一刀插入心臟」形容傷痛嘅何詩，似乎仍未原諒呢位昔日摯友，一於當睇祖兒唔到，睬都費事。
以為佢兩個好難再破冰，點知上星期四（ 19日）阿詩深夜時分突然 follow咗 8個 ig帳戶，有國家地理頻道及山系用品，但呢啲都係掩眼法，最重要係忽然覺醒再 follow番容祖兒。
對於曾公開說：「以後唔提容祖兒三個字」嘅何韻詩嚟講，呢個 follow按扭唔易㩒㗎，難得曾經嘅好姊妹兼知己 follow番，容祖兒當然開心啦，週日出席活動笑不攏嘴，但對於何韻詩再次按 follow關注，容祖兒就笑笑口話不作回應，應該係怕講錯說話得失舊好友啦。難得同男友劉龍感情穩定，好友又 comeback，情人同知己都擁有，真係那些年最好的時光喇！
12年 插入心臟
當年被拍得同劉浩龍喺跑馬地食串燒，仲搵嚟 Wyman分散注意力，但原來當時師兄已經暗溝祖兒成功。新聞一出，何韻詩即在微博寫上「一刀插上心臟」字句，仲即時取消關注二人。
採訪、撰文：娛樂組
攝影：攝影組
|
鍾意就快D Share啦！
|
|
|
