李欣樺 Sylvia
理工大學旅遊業管理 Yr.3
玩開童軍，成日都去露營， Sylvia就話自己一啲公主病都冇，洗衫煮飯甚至紮營都冇問題。
U花 U草
至索女 Scout 最愛大露營
電影《戇 Scout打爆喪屍城》，三位主角靠童軍所學嘅求生技能自製創意武器，成功對付大群喪屍瘋狂追殺。雖然劇情搞笑多，不過由小學三年級開始做童軍嘅李欣樺 Sylvia堅係周身刀，仲拎埋深資童軍獎章，要 Sylvia紮營、燒嘢食起爐，甚至去荒島生活都無難度！
Sylvia出身自童軍家庭，爸爸、媽媽、細佬都係童軍，由細到大父母就同 Sylvia講童軍有幾好玩，學到好多嘢。放假仲會成家人一齊打繩結、整吓馬騮橋，不過估唔到 Sylvia連大學揀科都受童軍影響。
「四年前嘅暑假我跟童軍去瑞典大露營，去到有來自世界各地嘅童軍，我哋互相交流文化，煮吓嘢食俾其他國籍嘅朋友，我為咗表演仲特登跟夏國璋師傅（著名舞獅教練）學打鼓。為期三星期嘅大露營令我識咗好多法國、德國嘅朋友，直到𠵱家都仲有聯絡，最開心係撞啱我生日，好多外國朋友一齊同我慶祝，仲各自用佢哋嘅語言唱生日歌我聽，真係好難忘！」
Sylvia露營之後決定要讀旅遊，雖然當時 DSE唔夠分直升上學位，但佢讀 high dip時狂溫書，「最後升到上 degree真係好開心，上年仲有機會去到間五星級大酒店做實習，見過碧咸、李敏鎬、李光洙呢啲明星，嚟緊去法國 exchange希望可以再見識多啲，同埋去探住喺法國嘅童軍朋友」
撰文：葉浩婷
攝影：范仲良
化妝及形象： Kika Wong
|
鍾意就快D Share啦！
|
|
|
